Arab koalitsiyasi Yamanni ozod qilish operatsiyasi boshlanganini e’lon qildi

Ta’kidlanishicha, arab koalitsiyasi "husiylar Eron tomonidan harbiy jihatdan qo‘llab-quvvatlanayotgani borasida rad etib bo‘lmas dalillarga ega".

Foto: REUTERS/Khaled Abdullah/File Photo

Saudiya Arabistoni boshchiligidagi arab koalitsiyasi Yamanning "Ansar Alloh" (husiylar) harakati guruhlari tomonidan nazorat qilinayotgan hududlarini ozod qilishga qaratilgan keng ko‘lamdagi harbiy operatsiya boshlanganini e’lon qildi. Bu haqda alyans rasmiy vakili polkovnik Turkiy al-Malikiy ma’lum qildi.

"Biz Yamanni barcha frontlar va yo‘nalishlar bo‘ylab husiylardan ozod qilish kampaniyasini boshlaymiz", - deya al-Malikiyning so‘zlaridan iqtibos keltirmoqda Al Hadath telekanali.

Uning ta’kidlashicha, "Ansar Alloh" tarafdorlari "mamlakatdagi nizoni siyosiy barqarorlashtirish jarayoniga putur yetkazmoqda va muloqotdan bosh tortmoqda".

Al-Malikiy koalitsiya "husiylar Eron tomonidan harbiy jihatdan qo‘llab-quvvatlanayotgani borasida rad etib bo‘lmas dalillarga ega" ekanini ta’kidladi.

Dushanba kuni Saudiya Arabistoni tomonidan qo‘llab-quvvatlanadigan harbiy otryadlar husiylar Yaman markazidagi Shabva viloyatidan butunlay quvib chiqarilganini ma’lum qildi.

Yamanda 2014 yil avgustdan beri hukumat kuchlari va husiylar o‘rtasida qarama-qarshilik davom etib kelmoqda. Ushbu ixtilofda Saudiya Arabistoni boshchiligidagi koalitsiya hukumat kuchlarini qo‘llab-quvvatlab keladi.

Tayyorlagan: Дилшод Аскаров

#Yaman #husiylar