17:16 / 17.01.2022
13439
Ямандаги ҳусийчилар дронлар ёрдамида БААга ҳужум уюштирди

Al Mayadeen телеканали маълумотларига кўра, БАА ҳудудига 20 та дрон ва 10 та баллистик ракета ёрдамида ҳужум қилинган. Ҳужум оқибатида 3 киши ҳалок бўлиб, 6 киши яралангани айтилган.

Видеодан кадр

Яманнинг «Ансор Аллоҳ» (ҳусийчилар) исёнчи ҳаракати Бирлашган Араб Амирликлари (БАА) ҳудудига ҳужум уюштирганини эълон қилди. Бу ҳақда Al Jazeera хабар берди. 

«Ансор Аллоҳ» расмий вакили Яҳё Сариянинг таъкидлашича, «яқин бир неча соат ичида ҳаракат ҳарбий амалиёт ҳақида баёнот беради».

БАА ҳудудига Ямандан 20 та дрон ва 10 та баллистик ракета ёрдамида ҳужум уюштирилди, деб хабар берди Al Mayadeen телеканали ўз манбаларига таяниб. Уларга кўра, дрон ва ракеталар «нозик нишонларни урган».

Ҳужум оқибатида 3 киши ҳалок бўлиб, 6 киши яралангани айтилган.

Аввалроқ, Абу-Даби полицияси учта ёқилғи ташувчи автомобиль ёниб кетган Ал-Мусаффаҳ саноат ҳудудида, шунингдек, мамлакат пойтахти аэропорти яқинидаги қурилиш майдончасида ёнғин содир бўлгани ҳақида хабар берган эди. Уларнинг барчаси зудлик билан ўчирилган. 

Қайд этилишича, аэропортдаги ёнғин ҳаво қатновига ҳеч қандай таъсир кўрсатмаган. Шу билан бирга, хавфсизлик кучлари воқеа жойида ҳужум қилган дронларнинг тахминий бўлаклари топилганини маълум қилди. 

Саудия Арабистони бошчилигидаги коалиция ҳам ҳусийчилар дронлардан, шу жумладан Сана халқаро аэропортидан учирилган учувчисиз учар қурилмалардан фойдаланган ҳолда ҳужум қилганини билдирди.

Ўтган ҳафта «Ансор Аллоҳ» раҳбарияти аъзоси Муҳаммад ал-Баҳити, агар мамлакат Яман можаросига ҳарбий аралашувини тўхтатмаса, исёнчилар БААга ракета ҳужумлари уюштириши ҳақида огоҳлантирган эди. 

Санадан «Ал-Араби» телеканалига берган интервьюсида у БАА 2019 йилда Саудия Арабистони бошчилигидаги араб коалициясида иштирокини тўхтатишга қарор қилганини, бу, унинг сўзларига кўра, Яман халқига қарши тажовузни бошлаб берганини эслатди. «Бироқ, яқинда Амирлик қуролли кучлари яна Шабва, Мариб ва Ал-Бейдада жанг қилаётган ёлланма аскарларни қўллаб-қувватлашни бошлади», — деди ал-Баҳити. У БААга «ҳарбий аралашувни тўхтатиш»ни маслаҳат берди, «акс ҳолда ҳусийчиларнинг жавоб қайтаришдан бошқа иложи қолмайди». 

Ямандаги можаро 2014 йил августидан бери давом этмоқда. Ҳарбий қарама-қаршилик Саудия Арабистони бошчилигидаги коалиция қўшинлари 2015 йил март ойида президент Абд Раббо Мансур Ҳодийга содиқ қуролли кучларни қўллаб-қувватлаш мақсадида мамлакатга кирганидан кейин кучайган. 

Ямандаги уруш дунёдаги энг катта гуманитар инқирозни келтириб чиқарди. БМТ маълумотларига кўра, 24 миллиондан ортиқ яманлик, яъни мамлакат аҳолисининг қарийб 80 фоизи инсонпарварлик ёрдамига муҳтож, давлат ичида бошқа жойга кўчиб кетганлар сони эса 3 миллиондан ошади. 

Top