10:28 / 19.01.2022
7604
Тошкентда бетон тўсиққа урилиб, ағдарилиб кетган «Матиз» ва «Спарк» иштирокида ЙТҲ юз берди

Тошкент шаҳрининг Яшнобод туманида содир бўлган йўл-транспорт ҳодисаси натижасида “Матиз” автомобили ағдарилиб кетди. Бу ҳақда пойтахт ИИББ хабар бермоқда.

Фото: ИИББ ахборот хизмати

Маълум қилинишича, Яшнобод туманида 19 январь куни соат 02:25 да 102 тизимидан тушган хабарга кўра, шу куни соат 00:30 ларда Фарғона йўли 2-даражали йўлда 1989 йилда туғилган ҳайдовчи А.Н. “Матиз” русумли автоуловини бошқариб кетаётиб рул бошқарувини йўқотган.

Қайд этилишича, у бетон тўсиққа урилган, тўқнашувдан сўнг “Матиз” русумли автоулови ағдарилиб кетиб, йўлнинг қарама-қарши йўналишидан ҳаракатланиб келаётган, 1997 йилда туғилган ҳайдовчи Ф.Ш. бошқарувидаги “Спарк” русумли автоулови билан тўқнашув содир этган.

Тўқнашув натижасида “Матиз” автоулови ҳайдовчиси А.Н. "ўнг оёқ эзилиб йиртилган жароҳати, бош ва юзи шилиниши, мастлик ҳолати" ташхиси билан 4-ШКШга мурожаат қилган. 

“Спарк” автоулови йўловчиси - 1981 йилда туғилган Ф.М. "бош сочли қисми юмшоқ тўқималари лат ейиши ва чап қош соҳаси эзилиб йиртилган жароҳати" ташхиси билан РКБ-1га мурожаат қилган.

Top