Ijtimoiy tarmoqlarda Nukus yo‘lida YTH sodir bo‘lgani haqida videolar tarqaldi. Holat yuzasidan Qoraqalpog‘iston Respublikasi YHXB rasmiy ma’lumot berdi.
Ma’lum bo‘lishicha, 27 yanvar kuni Nukus-Chimboy-Taxtako‘pir yo‘lining 18-19-km qismida yo‘l-transport hodisasi yuz bergan. Ikkita Cobalt qarama-qarshi yo‘nalishda harakatlanib, to‘qnashishi oqibatida 3 kishi halok bo‘lgan.
Kun.uz muxbiriga ko‘ra, YTH oqibatida halok bo‘lganlar Qoraqalpog‘iston madaniyati va tibbiyotiga katta hissa qo‘shgan insonlar yekani ma’lum bo‘ldi.
Ular O‘zbekiston shifokorlar assotsiatsiyasining Qoraqalpog‘iston bo‘limi rahbari, Qoraqalpog‘istonda xizmat ko‘rsatgan tibbiyot xodimi «Do‘stlik» ordeni sohibi Abdikerim Mambetkarimov (79 yoshda) va Qoraqalpog‘istonda xizmat ko‘rsatgan madaniyat xodimi, «Mehnat faxriysi» medali hamda «Mehnat shuhrati» orden sohibi Amaniyaz Juzimbetov (90 yoshda) va Azamat Juzimbetov.
Har ikkala marhumning yaqinlariga Joqarg‘i Kenges Raisi Murat Kamalov va Vazirlar Kengashi raisi Qahramon Sariyev ta’ziya bildirgan.
Qo‘shimcha qilinishicha, mashinalarda bo‘lgan yana ikki yo‘lovchi shifoxonada og‘ir ahvolda. Holat yuzasidan Jinoyat kodeksining 3-bo‘limi «a» bandi bilan jinoyat ishi ochilgan. Hozirda dastlabki tergov jarayonlari olib borilmoqda.
