5,5 mlrd so‘m. 280 ming xonadonning bir kunlik iste’moliga yetadigan tabiiy gaz o‘g‘irlangan

Energetika vazirligi tomonidan o‘tkazilgan tadbirlar davomida, 2022 yil yanvar oyining 25 kunida respublika bo‘yicha 215ta holatda ulgurji iste’molchilar tomonidan 4 mln 900 ming kub metr hajmdagi tabiiy gazdan noqonuniy foydalanilgani aniqlangan. Buning natijasida gaz ta’minoti korxonalari manfaatlariga 5,5 mlrd so‘m zarar yetkazilgan.

Ushbu hajmdagi tabiiy gaz 280 000ta xonadonning bir kunlik iste’molini tashkil etadi.

Aniqlangan barcha holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etilgan.

Ma’lumot uchun, 2021 yilda elektr, issiqlik energiyasi, gazdan foydalanish qoidalarini buzish kabi huquqbuzarliklar soni 86,4 foizga kamaygan.

Avvalroq, Samarqand viloyatining Narpay tumanidagi avtomobillarga gaz quyish shoxobchasi 300 ming xonadonning bir kunlik iste’moliga teng tabiiy gazni o‘g‘irlagani ma’lum qilingandi.