Iqlim o‘zgarishi sabab dunyo iqtisodiyoti keyingi 30 yilda 8 trillion dollar yo‘qotishi mumkin

Jahon meteorologiya tashkiloti ma’lumotiga ko‘ra, oxirgi 20 yilda tabiiy ofatlar intensivligi dunyo miqyosida 5 barobarga oshgan. Bu haqda O‘zgidromet bosh direktor o‘rinbosari Ibratjon Karimov ma’lumot berdi. 

Unga ko‘ra, 1971 yildan beri to hozirgacha 11 mingdan ortiq iqlim o‘zgarishlari bilan bog‘liq yirik tabiat halokatlari sodir bo‘lgan. Keyingi 30 yilga qilinayotgan bashoratlarga qaraganda, dunyo iqtisodiyoti iqlim o‘zgarishi natijasida 8 trillion dollar mablag‘ yo‘qotishi yoki YaIM 3 foizgacha pasayishi mumkin.

Ibratjon Karimov iqlim o‘zgarishlarining O‘zbekistondagi salbiy ta’siri miqyosiga ham to‘xtaldi.

“Orol dengizining halokatli qurishidan keyin, Orol hududidagi 5 mln 300 ming gektar maydonda Orolqum paydo bo‘ldi. Natijada atmosferaga har yili 100 mln tonna tuzli changlar ko‘tarilyapti. Ular Antarktidadan ham, kosmosdan ham topilmoqda. Bundan tashqari, dunyodagi isish jarayonlari O‘zbekistonning shimoliy hududlari bo‘lmish Qoraqalpog‘iston va Xorazmda ham isishni 2 barobar tezlashtirgan”, – dedi Karimov.