Keyingi hafta oxiridan o‘zbekistonliklar ketma-ket 4–5 kun dam olishadi

Prezident farmoniga binoan, 2022 yilgi Navro‘z bayrami munosabati bilan O‘zbekistonda 22 va 23 mart (seshanba-chorshanba) kunlari qo‘shimcha dam olish kuni deb belgilangan.

20 mart yakshanba ekani, 21 mart esa ishlanmaydigan bayram kuni ekani hisobiga, ketma-ket 4 kun dam olish kuni bo‘ladi. Haftasiga 5 kun ishlaydiganlar uchun esa 19 mart, shanba hisobiga dam olish kunlari ketma-ket 5 kunni tashkil etadi.

Ish haftasidan qat’i nazar, barcha uchun dam olish kunlari:

• 20 mart, yakshanba – odatiy dam olish kuni;
• 21 mart, dushanba – ishlanmaydigan bayram kuni – Navro‘z;
• 22 mart, seshanba – qo‘shimcha dam olish kuni;
• 23 mart, chorshanba – qo‘shimcha dam olish kuni.

Budjet tashkilotlarida 22 va 23 martdagi qo‘shimcha dam olish kunlari mehnat ta’tilining davomiyligini 2 kunga qisqartirish hisobiga qoplanadi. Mehnat ta’tili davrida saqlanadigan o‘rtacha oylik ish haqi miqdorini hisoblashda ta’tilning amaldagi davomiyligi hisobga olinadi, unga qo‘shimcha dam olish kunlari qo‘shiladi.

Har yillik mehnat ta’tilining davomiyligi 15 ish kunidan kam bo‘lmasligi kerak.