Rossiyani tark etgan kompaniyalar 180 mingdan ortiq xodimiga maosh to‘lashda davom etmoqda

Rossiya bozorini tark etgan xorij kompaniyalari rossiyalik 188 ming nafar xodimiga maosh to‘lashda davom etmoqda. Bu haqda Financial Times nashri xabar berdi. Nashrning hisob-kitoblariga ko‘ra, maosh olishda davom etayotgan eng ko‘p xodimlar McDonald's, Renault va Carlsberg kompaniyalarida. 

Ta’kidlanishicha, xorij kompaniyalaridan maosh olayotgan rossiyalik xodimlarning haqiqiy soni ancha ko‘p. Ayrim yirik ish beruvchilar, xususan, KFC Yum Brands va Coca-Cola xodimlariga oylik to‘lashda davom etayotgani haqida ma’lum qilmagan. 

IKEA may oyi oxiriga qadar maosh to‘lashni davom ettirishini bildirgan. Kompaniya xodimlarni bo‘shatish masalasida aniq javob bermagan. Levi’s ijrochi direktori Chip Berg kompaniya 800dan ortiq xodimiga oylik berishda davom etayotganini aytdi.

Bundan tashqari, Boston Consulting Group, Linklaters va McKinsey kabi kompaniyalar o‘z xodimlarini boshqa mamlakatlardagi ofislariga ko‘chirmoqda.

Shu bilan birga, agar kompaniyalar yaqin istiqbolda o‘z faoliyatlarini tiklamaydigan bo‘lsa, ishlab chiqarish, chakana va iste’mol sektoridagi xodimlar ish joylarini yo‘qotishlari mumkin.