09:51 / 03.05.2022
6155
Тошкент вилоятида ёнғинларни автоматик тарзда пайқайдиган биринчи камера ўрнатилди

Тошкент вилоятининг Бўстонлиқ туманида мамлакатда ёнғинларни автоматик тарзда пайқайдиган биринчи интеллектуал камера ўрнатилди, деб хабар бермоқда ИИВ.

Фото: ИИББ ахборот хизмати

Лойиҳа «Хавфсиз туризм» тизими доирасида Ахборот технологиялари ва коммуникацияларини ривожлантириш вазирлиги ҳамда Тошкент вилояти ИИББ Хавфсиз туризм бошқармаси томонидан амалга оширилган.

Икки спектрли термал тасвир ва оптик IP жойлашишни аниқлаш тизими бўлган ноёб Hikvision камераси ақлли хатти-ҳаракатларни таҳлил қилиш алгоритмини қўллаб-қувватлайди ҳамда ўрнатилган график процессор билан жиҳозланган. 

Бу технология ёнғин каби хавфли вазиятларни эрта босқичда юқори аниқлик билан аниқлаш ва реал вақтда сигнални ишга тушириш имконини беради.

Камера назорат қилинадиган ҳудуддаги вазиятни кузатиб боради ва ёнғинни келтириб чиқарадиган иссиқ ҳароратни пайқайди. Камера параметрлар меъёрдан ошиб кетганини аниқласа, у автоматик равишда қутқарув хизматларини хабардор қилади. Бу ҳам маъмурий, ҳам турар жой объектларини, шунингдек, туризм ҳудудларини самарали ҳимоя қилишга ёрдам беради.

Ушбу янгилик фавқулодда вазиятларда ҳаракат қилиш қобилиятини сезиларли даражада кучайтиради ва фавқулодда вазиятлар хизматларининг самарадорлигини оширади.

Top