Xalqaro mehnat tashkiloti tomonidan o‘tkazilgan xalqaro konferensiyada 2021 yilda O‘zbekistonda bolalar va majburiy mehnatga butunlay barham berilgani yana bir bor e’tirof etildi.
Xalqaro mehnat tashkiloti tomonidan Janubiy Afrika Respublikasining Durban shahrida gibrid shaklda “Bolalar mehnatiga barham berish bo‘yicha 5-Global konferensiya” bo‘lib o‘tmoqda. BMT Bosh Assambleyasi tomonidan e’lon qilingan “2021 yil Bolalar mehnatiga barham berish xalqaro yili” doirasida tashkil etilgan xalqaro konferensiyada O‘zbekistonlik vakillar ham ishtirok etyapti.
Senat matbuot xizmatining xabar berishicha, tadbir ochilishida qisqa muddatda bolalar mehnati va majburiy mehnatni butunlay bartaraf etish borasida amalga oshirilgan ishlar inobatga olinib, XMTga a’zo davlatlardan faqatgina O‘zbekistonga tadbirning ochilish marosimida kirish so‘zi bilan ishtirok etish imkoniyati berilgan.
Oliy Majlis Senati raisi Tanzila Norboyeva xalqaro konferensiyaning ochilish marosimida so‘zga chiqib, majburiy mehnatga barham berishda birinchi navbatda milliy qonunchilikni xalqaro standartlardan kelib chiqqan holda takomillashtirish, institutsional bazani rivojlantirish, monitoring va tadqiqotlar olib borish, qishloq xo‘jaligini modernizatsiya qilish borasida keng ko‘lamli ishlar amalga oshirilganligini qayd etdi.
Xususan, 2019-2021 yillar davomida bu boradagi milliy qonunchilikni takomillashtirish maqsadida 32 ta normativ-huquqiy hujjat qabul qilinganligi, har yili Xalqaro mehnat tashkilotining o‘rtacha ikkita konvensiyasi ratifikatsiya qilinayotganligi, bu sohada bolalar mehnati va majburiy mehnat uchun jinoiy javobgarlik choralarining kuchaytirilganligi samarali choralardan biri bo‘lganligi ta’kidlandi.
Tadbir ishtirokchilari O‘zbekiston tajribasi boshqa davlatlarga ham namuna bo‘lishi mumkinligini e’tirof etdi.
O‘zbekistonning bolalar mehnati va majburiy mehnatga qarshi kurashish borasidagi yo‘li to‘g‘ri va samarali ekanligi o‘z tasdig‘ini topdi. Milliy qonunchilikni xalqaro standartlarga implementatsiya qilishdan tortib, bu boradagi ishlarga barcha idoralarni jalb etish hamda ularning faoliyatini muvofiqlashtirib borish o‘z samarasini berdi, deya qayd etdi Xalqaro mehnat tashkiloti Bosh direktori Gay Rayder.
Xalqaro konferensiya 20 maygacha davom etadi.
