Samarqanddagi noodatiy mehmonxonani buzishga xulosa berildi. Tadbirkor qurilishga 3 million dollar sarflaganini aytmoqda

Samarqand tumani Jo‘yisoy mahallasi, Samarqand darvoza ko‘chasida joylashgan noodatiy ko‘rinishdagi binoni buzish bo‘yicha xulosa berilgan. Bu haqda Qurilish vazirligi rasmiy saytida e’lon qilindi.

Xabarda aytilishicha, qurilish uni ruxsat beradigan hujjatlarsiz amalga oshirilgan.

«Samarqand viloyati Samarqand tumani «Jo‘yisoy» mahallasida fuqaro F.Halilov tomonidan o‘z uyining bir qismini buzib, 21,4×12,6 metr o‘lchamdagi 11 qavatli 2 qavat yerto‘lali mehmonxona binosi qurilishi hech qanday qurilishga ruxsat beruvchi shaharsozlik hujjatlari rasmiylashtirilmasdan amalga oshirilgan.

– Qurilishga ruxsat beruvchi Samarqand tumani hokimining qarori yoki tuman qurilish bo‘limining ruxsatnomasi mavjud emas;

– Arxitektura rejalashtirish topshirig‘i (APZ) mavjud emas;

– Muhandislik geologiyasi, loyiha-smeta hujjatlari to‘liq ishlab chiqilmagan hamda tasdiqlanmagan;

– Belgilangan tartibda shaharsozlik kengashidan o‘tmagan;

– Mehmonxona majmuasi obekti bosh rejasini naturaga ko‘chirish dalolatnomasi rasmiylashtirilmagan (ShNQ 3.01.01-03ning 2.4 bandi bajarilmagan);

– Qurilish obektida foydalanilgan qurilish materiallarining talablarga muvofiqligi to‘g‘risidagi pasport va sertifikatlari taqdim etilmadi;

– ShNQ 3.01.01-03ning 7.8,9.9 bandlariga asosan yopiq ishlarni guvohlash dalolatnomalari taqdim etilmadi.

Yuqoridagi kamchiliklar mavjud bo‘lsa-da, qurilishga ruxsat beruvchi boshlang‘ich shaharsozlik hujjatlari rasmiylashtirilmagan holda qurilish-montaj ishlari konstruksiyalar bitgandan so‘ng «Konstant proyekt» MChJ tomonidan loyiha hujjatlari to‘liqsiz ishlab chiqilgan. «Triumf Proyekt» MChJ xususiy ekspertiza tashkiloti tomonidan to‘liq ishlab chiqilmagan loyiha hujjatlariga birlamchi ruxsat beruvchi hujjatlar ham yo‘q. Shuningdek, Vazirlar mahkamasining 2016 yil 22 yanvardagi 15-sonli qarorining 21-bandiga zid ravishda 2018 yilda 24 martda ijobiy xulosa berilgan.

Qurilish davomida hududiy inspeksiya xodimlari tomonidan bir necha bor qurilishni to‘xtatish bo‘yicha ko‘rsatmalar berilgan bo‘lsa-da, fuqaro F.Halilov tomonidan ish o‘zboshimchalik bilan davom ettirilgan. Mehmonxona qurilishi obekti bo‘yicha maxsus litsenziyaga ega «SVP MASKAN» MChJ mutaxassislari tomonidan 2016 yilda binoning texnik holati o‘rganilib, rigel va temir beton ramalarni kuchaytirish uchun loyiha hujjatlari ishlab chiqish bo‘yicha xulosa berilgan.

Ushbu kuchaytirish bo‘yicha tegishli loyiha ishlab chiqilmagan va ekspertiza organlarining ijobiy xulosasi olinmagan.

«O‘zog‘irsanoatloyiha»AJ va hududiy inspeksiya xodimlari tomonidan 2022 yil 6 may kuni binoning seysmik holati o‘rganib chiqilib, «O‘zog‘irsanoatloyiha» AJning xulosasiga asosan binoning KMK, ShNQ talablariga javob bermasligi va kolonnalarning ayrim joylari darz ketgani o‘z tasdig‘ini topgan hamda binoni buzish bo‘yicha xulosa berilgan», deyiladi Qurilish vazirligi e’lon qilgan munosabatda.

Kun.uz muxbiri holat yuzasidan izoh olish maqsadida mehmonxona egasi Furqat Halilovga yuzlandi. Uning aytishicha, 12 qavatli binoning dastlabki 4 qavati suvenir do‘konlari, eng yuqori ikki qavat restoran va oradagi qavatlar mehmonxona qilishga mo‘ljallangan. Pastida ikki qavatli muzlatkich vazifasini bajaruvchi yerto‘la ham bor. Qurilish 2012 yilda boshlangan va tadbirkor unga 3 million dollar pul sarflaganini aytdi. Furqat Halilovning aytishicha, loyiha arxitektori yaponiyalik bo‘lgan va qurilishni bitta korxona boshidan oxirigacha amalga oshirgan.

Mehmonxona egasi 10 yildan buyon davom etayotgan qurilishga ruxsat olishga ko‘p marta harakat qilgani, ammo doim mujmal javob olganini aytdi. Furqat Halilov binoni buzishga berilgan xulosadan ham norozi bo‘lganini ta’kidladi. Qurilish egasi mehmonxona barcha xavfsizlik va seysmik talablarga javob berishi, qo‘shnilarining qurilishga qarshi emasligi bo‘yicha ruxsati ham borligini ma’lum qildi.

Ma’lumot uchun, ushbu mehmonxona Samarqand tumanidagi Imomi A’zam nomidagi masjid yaqinida, mashhur qog‘oz ishlab chiqiladigan hunarmandchilik markaziga ketadigan yo‘l bo‘yida joylashgan. Ushbu bino haqida oxirgi vaqtlarda ketma-ket blogerlar va ijtimoiy tarmoq faollari yoza boshlagach, rasmiy idoralar munosabat bildirdi. 10 yil avval qurilishi boshlangan va Samarqandda juda mashhur bo‘lgan bino taqdiri haqida bungacha hech bir tashkilot rasmiy munosabat bildirmagandi.

Qonunchilikka ko‘ra, biror bino buzilishi uchun tegishli sud qarori bo‘lishi talab qilinadi. Hokimlik tadbirkorni 2016 yilda sudga bergan va tadbirkorning aytishicha, ish ko‘rilmay qoldirilgan. Tez orada bu borada Kun.uz’da to‘liq surishtiruv e’lon qilinadi.