AQSh Ukrainaga 1,2 mlrd dollarlik yordam paketi ajratdi

Ukrainaga 1 mlrd dollarlik qurol-yarog‘ hamda gumanitar yordam uchun 225 mln dollar beriladi.

Foto: AP

AQSh Ukrainaga xavfsizlik sohasida yordam berish uchun qo‘shimcha ravishda yana 1 mlrd dollar taqdim etadi. Bu haqda AQSh prezidenti Jo Baydenning bayonotida ma’lum qilindi.

Qayd etilishicha, AQSh Ukrainaga artilleriya qurilmalari va sohil mudofaasi tizimlari, artilleriya uchun o‘q-dorilar va ilg‘or raketa tizimlarini yetkazib beradi.

Bundan tashqari, aholini ichimlik suvi, muhim dori-darmonlar va oziq-ovqat bilan ta’minlash, boshpanalar qurish uchun 225 mln dollar beradi.

BMTning ma’lumot berishicha, 24 fevraldan buyon tinch aholi orasidan 4452 nafar kishi halok bo‘lgan, 5531 nafar kishi yaralangan. Qayd etilishicha, tinch aholi orasidan qurbonlar soni bundan ko‘proq, ammo ma’lumotlar kechikib yetkazilmoqda va tekshirishni talab qiladi.

Ukrainalik qochqinlar soni 5 mln nafardan oshgan. Rossiyada qariyb 1,2 mln qochqin, Polshada 1,17 mln qochqin ro‘yxatga olingan.

Avvalroq Bloomberg agentligi AQSh Ukrainaga "Harpun" raketalarini yetkazib berishni rejalashtirgani haqida xabar bergandi.