Xarkivda universitet o‘qqa tutildi, Seversk - bombardimon qilinmoqda. Urush suratlari
Ukrainada urushning 133-kuni o‘tdi.
6 iyulga o‘tar kechasi rossiyalik harbiylar Xarkivdagi Grigoriy Skovoroda nomidagi Milliy pedagogika universiteti binosiga havo hujumi uyushtirdi; qorovul halok bo‘ldi. RF mudofaa vazirligi AQSh Ukrainaga yaqinda yetkazib bergan ikkita HIMARS baravar o‘t ochish reaktiv tizimi yakson etilganini ma’lum qildi, Ukraina qurolli kuchlari bosh shtabi buni «feyk» deb atadi. Donbass shimolida otishmalar davom etmoqda — Seversk shahri ham zarbalardan jiddiy jabrlanmoqda. Irlandiya bosh vaziri Kiyev oblastiga keldi va Ukrainani Yevroittifoqqa kirish masalasida qo‘llab-quvvatlashni va’da qildi. Moskva Putin noyabrda G20 sammitida ishtirok etmoqchiligi haqida xabardor qildi. Sammitga Zelenskiy ham taklif etilgan.
Quyida 6 iyul kuni Ukrainaning turli hududlarida olingan suratlar.
Xarkiv oblasti
Donbass shimoli
Ukraina harbiylari Severskda yaralangan askarni olib ketmoqda. Amerikadagi Urushlarni tadqiq qilish instituti (ISW) 6 iyul kungi hisobotida Rossiya armiyasi Lisichanskdan g‘arbga va Lugansk oblasti chegarasidan Seversk yo‘nalishi bo‘yicha harakatlanayotgani haqida xabar berdi. Ukraina harbiylariga ko‘ra, Seversk hududiga havo zarbalari berilgan.
Kiyev oblasti
Kiyevdagi Mixaylovskaya maydoni. Knyaginiya Olga yodgorligi o‘qlardan himoyalash uchun qum to‘ldirilgan qoplar bilan o‘rab qo‘yilgan. Surat Irlandiya bosh vaziri Mixol Martinning Ukrainaga tashrifi vaqtida olingan. U Irlandiya urushdan keyin Ukrainani tiklashga yordam berishini va’da qildi.