AQShda suv toshqinlaridan so‘ng 40dan ortiq odam bedarak yo‘qoldi

AQShning Virjiniya shtatida yuz bergan suv toshqinlaridan so‘ng qutqaruvchilar va politsiya kamida 44 kishini qidirmoqda, deb xabar berdi CNN.

Qayd etilishicha, ular bilan aloqa uzilgan va qayerdaligi hozircha noma’lum.

Seshanba kuni boshlangan kuchli yomg‘irlar oqibatida Buchanan okrugidagi aholi maskanlari suv ostida qoldi.

Ko‘plab uylar vayron bo‘lgan, yo‘llar va ko‘priklarga shikast yetgan, aloqa simlari uzilgan. Shtatda favqulodda vaziyat e’lon qilingan.

Politsiyaning ma’lumot berishicha, tabiiy ofatning og‘ir oqibatlariga qaramasdan, hech kim qurbon bo‘lmagan.