08:44 / 15.07.2022
4687
Американинг Cargo Dragon юк кемаси яна ХКСга учирилди

SpaceX компаниясининг космик юк машинаси орбитал станция халқаро экипажи учун озиқ-овқат, шунингдек, илмий тажрибалар учун асбоб-ускуналар ва материалларни етказиб беради.

Фото: Getty Images

АҚШнинг шарқий соҳилларидан Американинг SpaceX компаниясига қарашли Cargo Dragon юк кемаси Халқаро космик станцияга (ХКС) муваффақиятли учирилди. 15 июль, жума куни кечқурун Флорида штатидаги Канаверал бурунидан парвоз Falcon 9 оғир ракета ташувчиси ёрдамида амалга оширилди, деб хабар берди АҚШ Миллий аэронавтика ва космик фазо бошқармаси (NASA). 

SpaceX компанияси парвоздан бир неча дақиқа ўтгач, Falcon 9 ракета ташувчисининг биринчи поғонаси Атлантика океанидаги сузувчи платформага муваффақиятли қўнганлиги ҳақида хабар берди. 

АҚШ космик агентлиги режасига кўра, космик аппарат ХКСга 16 июль куни АҚШнинг Шарқий қирғоғи вақти билан соат 11:20 да (Тошкент вақти билан 20:20) етиб келади. У автоном тарзда ХКСнинг Америка сегментидаги Harmony модули олдинги портига қўшилади ва у ерда бир ойга яқин вақт бўлади.

Бу NASA ва Илон Маскнинг SpaceX компанияси ўртасидаги шартнома асосида Cargo Dragon’нинг ХКСга 25-марта учирилиши. Дастлаб парвоз 10 июнь куни амалга оширилиши режалаштирилган эди. 24-Dragon космик кемаси миссияси 2021 йил 21 декабрдан 2022 йил 24 январгача давом этди. 

Космик «юк машинаси» станцияга орбитал станция халқаро экипажи учун 2,6 тоннага яқин озиқ-овқат, шунингдек, илмий тажрибалар учун асбоб-ускуналар ва материалларни етказиб беради. Хусусан, ХКС бортида иммун ҳужайраларининг қаришини ўрганиш режалаштирилган. 

Айни пайтда россиялик космонавтлар Олег Артемьев, Сергей Корсаков ва Денис Матвеев, шунингдек, 28 апрель куни Crew Dragon кемасида етиб келган NASA астронавтлари Челл Линдгрен, Роберт Хайнс, Жессика Уоткинс ва Европа космик агентлиги (ESA) астронавти италиялик Саманта Кристофоретти ХКСда ишлашни давом эттирмоқда.

Top