Shavkat Mirziyoyev Draupadi Murmuni Hindiston prezidenti etib saylangani bilan tabrikladi

Prezident Shavkat Mirziyoyev "Bxaratiya janata parti" hukmron partiyasi boshchiligidagi Milliy-demokratik alyansidan nomzod Draupadi Murmuga Hindiston prezidenti etib saylangani munosabati bilan tabrik yo‘lladi.

Foto: Prezident matbuot xizmati

Davlatimiz rahbarining maktubida birgalikdagi sa’y-harakatlar bilan O‘zbekiston va Hindiston o‘rtasidagi ko‘p qirrali, uzoq muddatli va o‘zaro manfaatli aloqalar sifat jihatidan yangi bosqichga ko‘tarilishiga ishonch bildirilgan.

Hindistondagi prezidentlik saylovlarida Milliy-demokratik alyansdan nomzod, 64 yoshli Draupadi Murmu 64,03% ovoz bilan g‘alaba qozondi.

Draupadi Murmu Hindiston prezidenti lavozimini egallagan birinchi adivasi (Hindistonning aborigen xalqi) va 2007−2012 yillarda ushbu lavozimni egallagan Pratibxa Patildan keyin ikkinchi ayol kishi bo‘ldi.

Hindiston prezidenti vakillik funksiyalarini bajaradi, hukumat qarorlarini esa bosh vazir qabul qiladi. Hukumatni ayni damda Narendra Modi boshqarmoqda.