Afg‘onistondagi vaziyat fonida Rossiya Tojikiston va Qirg‘izistondagi bazalari jangovar tayyorgarligini oshiradi - Shoygu

Afg‘onistondagi vaziyat fonida Rossiya Tojikiston va Qirg‘izistondagi bazalari hamda boshqa inqirozga qarshi kurash kuchlarining jangovar tayyorgarligini oshiradi, dedi RF mudofaa vaziri Sergey Shoygu chorshanba kuni Toshkentda Shanhay hamkorlik tashkiloti (ShHT)ga a’zo mamlakatlar harbiy idoralari rahbarlari yig‘ilishida. Bu haqda TASS xabar bermoqda.

«O‘z navbatida, biz Qirg‘iziston va Tojikistondagi Rossiya harbiy bazalari hamda yuzaga kelishi mumkin bo‘lgan inqirozli vaziyatlarga javob berish boshqa kuchlarining jangovar tayyorgarligini oshirmoqdamiz», — dedi u.

Shoyguning so‘zlariga ko‘ra, IShID va «Al-Qoida» kabi xalqaro terrorchilik tashkilotlari yanada faollashayotgan Afg‘onistondagi vaziyat «Markaziy Osiyoda jiddiy xavfsizlik muammosi bo‘lib qolmoqda». «Mamlakatda davom etayotgan qurolli to‘qnashuvlar fonida ijtimoiy-iqtisodiy vaziyat yomonlashmoqda, radikalizm mafkurasi singdirilmoqda, narkotik moddalar savdosi va transchegaraviy jinoyatlar avj olmoqda», — dedi Rossiya mudofaa vaziri.

Uning ta’kidlashicha, Moskva afg‘on masalasini hal qilish bo‘yicha har qanday xalqaro tashabbuslarni ma’qullaydi va Markaziy Osiyo mintaqasida xavfsizlikni ta’minlash choralarini ko‘radi. 

Xususan, Shoyguning eslatishicha, iyun oyida Rossiya poytaxtida Markaziy Osiyo davlatlari va RF Mudofaa vazirliklari rahbarlarining birinchi uchrashuvi bo‘lib o‘tgan, unda Afg‘oniston yo‘nalishidagi vaziyat va uni barqarorlashtirish yo‘llari ko‘rib chiqilgan. 

«Biz bunday uchrashuvlar ShHT platformasida, jumladan, huquq-tartibot idoralarimiz o‘rtasidagi muvofiqlashtirishni kuchaytirish uchun ham talabga ega bo‘lishiga ishonamiz, ayniqsa Afg‘oniston ShHTda kuzatuvchi davlat bo‘lganligi sababli», — deya qo‘shimcha qildi Rossiya Mudofaa vazirligi rahbari. 

Bundan oldin bir guruh afg‘onistonliklar chegarani buzib O‘zbekiston hududiga o‘tgani xabar qilingandi.