“Biznes boshlash osonlashadi” - tadbirkorlar prezident bilan uchrashuv taassurotlari haqida

“Biznes uchun birinchi qadam osonlashtirildi”

Hasan Mamasaidov – Office Market, Deli va Dekos kompaniyalari asoschisi, MFaktor loyihasi muallifi:

— O‘tgan yili tadbirkorlar kuni belgilanganidan keyin, bu yil ham an’anaviy tarzda davlat rahbarining tadbirkorlar bilan uchrashuvida qatnashdik. Samimiy uchrashuv guvohi bo‘ldik.

Ko‘p masalalar kun tartibiga qo‘yildi. Bular ichida tadbirkorlik faoliyatining kesimlarga bo‘lingani ayniqsa katta narsa bo‘ldi. Chunki mikrobiznes, ya’ni bir milliongacha bo‘lgan aylanmadagi biznes turi yosh tadbirkorlarga, startaperlarga qulay bo‘ladi. Kichik, o‘rta va yuqori bizneslardan ko‘ra katta qulayliklar yaratilgani yosh tadbirkorlarning biznesga kirib kelishini yengillashtiradi.

Endi yengillashtirilgan tartibda yosh tadbirkor bir yilda 20 mln so‘mgacha pul to‘lab, 6 oylik hisobotni qilmasligi mumkin. Oldin yangi kasblarga oid biznesni yo‘lga qo‘ymoqchi bo‘lganlar – masalan, ayti biznesiga kirmoqchi bo‘lganlarda qo‘rquv bo‘lardi: soliq bobidagi, yoki buxgalteriyaga oid xatolar ularning ma’muriy yoki jinoiy javobgarlikka tortilishiga sabab bo‘lib qolardi. Haqiqatan, 1 mlrd so‘mgacha aylanmaga ega mikrobiznesni yuritadiganlar uchun biznes yuritish osonlashtiriladi – buxgalteriya hisobi kabi katta qiyinchiliklar talab qilinmaydigan ko‘rinishda olib boriladi. Chunki 1 mlrd so‘m va undan yuqori aylanmasi bo‘lgan holatlarda QQS tizimiga o‘tsa, uchyotda hisob-kitob olib borish qimmat turardi.

Aholining 70 foizi – yoshlar. Yoshlarning birinchi biznesga kirib kelishini osonlashtirish kelajakda ularning keyingi pog‘onaga chiqishiga stimul bo‘ladi.

QQS 12 foizga o‘tishi ham tadbirkor, ham iste’molchilarga qulaylik yaratadi, biznesning qorong‘ilikdan yorug‘likka o‘tishida o‘ziga xos stimul vazifasini bajaradi.

“Asl islohot – qonun ustuvorligining ta’minlanishi bo‘ladi”

Murod Nazarov – “Murad Building” kompaniyasi asoschisi

— Har yili prezidentning o‘zi tadbirkorlar bilan ko‘rishib, muammolarini eshitib, qayerda noto‘g‘ri ketyapmiz, noto‘g‘ri ketayotgan bo‘lsak to‘g‘rilaylik degan ma’nodagi fidbek tadbir o‘tkazishini hurmatga loyiq deb bilaman.

Muammolar bor, har bir tadbirkorning ichida muammosi bor. Biroq ular oldingidan kamligini aytsak, adolatli bo‘ladi. Lekin bularning asl negizida asosiy islohot qaratilishi kerak bo‘lgan yo‘nalish – qonun ustuvorligi. Qonun har bir tadbirkor, fuqaro uchun adolatli bo‘lishi kerak, shunda islohotlar samarasini ko‘rsatadi. Bu mening shaxsiy fikrim.

Bilasizmi, bu psixologiyada ham bor – inson miyasida bir nechta miya bor: eng kichigi “hayvon” miyasi va bu xavfsizlikni ta’minlash, qorinni to‘ydirish bo‘lsa, undan keyingi qatlamda ijod bor. Oldin jon saqlash fikri bilan yuradigan tadbirkorlar hozir ko‘proq ijod, biznesni rivojlantirish, qanday qilib yangi yo‘nalishlarni topish mumkin, qanday jahonga chiqsak bo‘ladi degan fikrlar bilan yuribmiz.

“Hududlar holatidan kelib chiqib yondashuv belgilangani – yaxshi yangilik”

Hasan Mamasaidov:

— Oddiy misol: Andijonga to‘g‘ri keladigan holat Navoiyga to‘g‘ri kelmaydi: Andijonda hudud kichkina, odamlar ko‘p, Navoiyda yer va hudud borasidagi qulayliklar Andijonga noqulay bo‘lishi mumkin. Shundan kelib chiqib Navoiydek hududi katta, aholisi kam joylar uchun, shu bilan bir qatorda Qoraqalpog‘iston bo‘lsin, Sirdaryo bo‘lsin – hammasiga o‘ziga xos yechimlar ustida yondashuvga e’tibor qaratildi.

Bozorlarni yaratish va pul oqimini rag‘batlantirish borasidagi yechimlar, pul mablag‘lariga bo‘lgan resurslarni oson qabul qilish, sug‘urta va garov bobida 3 yildan 5 yilgacha, 5 yildan 7 yilgacha pul jalb qilish ham tashkil qilinishi biznesni uzoqroq reja qilishga yordam beradi. Chunki biznesga endi kirayotganda pul jalb qilish 1 yildan 7 yilgacha bo‘lsa, texnologiyalarga katta resurs va inshootlarga pul tikish tadbirkorlar qo‘lidan kelmagani uchun investitsion yondashuv imkoniyati cheklanardi. Bu ham katta impuls bo‘ladi.

Yangi kelgan hokim eski hokimning yerga oid qarorini bekor qilsa, tadbirkorlar ishonchiga putur yetkazadigan holat edi. Bunga ham barham berilmoqda. Sud qarorisiz yoki biznes ombudsman ruxsatisiz o‘rinsiz tekshiruvlarni kamaytirish kabilar ham yaxshi yangilik bo‘ldi.

“Muhtaram so‘zi ishlatilmadi”

Hikmat Abdurahmonov – “Ground Zero” kovorking-markazlari asoschisi, “Team” universiteti ta’sischilaridan biri:

— Prezident bilan bo‘lgan uchrashuvdan muhim kuzatuv va ijobiy o‘zgarishlar: har 5 daqiqa turishga to‘g‘ri kelmadi, muhtaram so‘zi ishlatilmadi, uchrashuvda “dirijyorlar” bo‘lmadi, uni gapir buni gapirma degan. Albatta paxta bo‘ldi-yu, lekin tadbirkorlar o‘zidan chiqdi, endi nima qilamiz, o‘zbekmiz…

“Kichik summa uchun garov ta’minoti bekor qilindi”

Sadoqat Mirzayeva – “Art House Sadosh” MChJ rahbari:

— Prezident bilan ochiq muloqotga bir nechta takliflar bilan kirgandim, lekin ulardan eng asosiysi garov ta’minoti bilan bog‘liq edi. Hunarmandlar misolida qaraydigan bo‘lsak, bankdan 30 milliongacha kichik qarz olmoqchi bo‘lsa ham garov ta’minoti so‘ralardi. Hunarmand – endi ish boshlayotgan va qo‘l mehnati bilan buyumlar tayyorlaydigan tadbirkor. Xursand qiladigan tomoni, mana shu narsaga yechim berilgani va bu men uchun yaxshi yangilik bo‘ldi.

“O‘zbekistonda xizmat ko‘rsatgan tadbirkor” unvonini ta’sis etilishi ham katta narsa bo‘ldi. Men dastavval 6 yil davomida yakka tartibdagi tadbirkor bo‘lib faoliyat ko‘rsatgan bo‘lsam, bir yildan beri katta MChJ rahbariman. Yuzlab ayol-qizlarni ish bilan ta’minlaganman. Bundan tashqari, oddiy bir yillik faoliyatimni yuksak baholab “Faol tadbirkor” ko‘krak nishonining berilishi ham quvontirdi.

Uchrashuvga bu yil qanaqa yangilik bo‘larkan degan o‘y-xayol bilan kirgandik. Endi aytilgan tashabbuslarni hazm qilish qoldi, xolos.