O‘zbekiston bosh vaziri o‘rinbosari – investitsiyalar va tashqi savdo vaziri Jamshid Xo‘jayev 6 sentabr kuni Yevropa ittifoqining O‘zbekistondagi elchisi Sharlotta Adrian bilan uchrashdi.
Uchrashuvda savdo-iqtisodiy, moliyaviy-texnikaviy sohalardagi munosabatlar hozirgi holati va istiqbollari, O‘zbekiston Jahon savdo tashkilotiga a’zo bo‘lishi doirasidagi o‘zaro hamkorlik masalalari muhokama qilindi.
2022 yil yanvar-iyul oylarida O‘zbekiston va Yevropa ittifoqiga a’zo davlatlar o‘rtasidagi tovar ayirboshlash hajmi 15 foizga o‘sib, 2,4 milliard dollarni tashkil etdi, bu O‘zbekiston tomonidan GSP+ benefitsiari maqomiga ega bo‘lgani sababli amalga oshirildi. Ushbu maqomni saqlab qolish va uzaytirishga o‘zaro tayyorlik bildirildi.
Tomonlar O‘zbekiston va Yevropa ittifoqi o‘rtasidagi kengaytirilgan sheriklik va hamkorlik to‘g‘risidagi bitim texnik tartibga solish, sanitariya va fitosanitariya chora-tadbirlari, intellektual mulk huquqlarini himoya qilish, bojxona nazorati va boshqa yo‘nalishlarda Yevropa investitsiyalari va tajribasini jalb qilish orqali ikki tomonlama munosabatlarni yanada kengaytirish va iqtisodiy rivojlanishni yaxshilashga yangi turtki berishiga ishonch bildirdi.
O‘zbekiston JSTga kirishi doirasida o‘zaro hamkorlik masalalari muhokama qilindi. Yevropa tomoni ushbu jarayonga texnik va maslahat yordamini ko‘rsatishni davom ettirishga sodiqligini bildirdi.
Yevropa ittifoqi 2021-2024 yillarga mo‘ljallangan O‘zbekiston bilan hamkorlikning 83 million yevrolik yangi indikativ dasturi ko‘rib chiqildi. Dasturni qishloq va suv xo‘jaligini modernizatsiya qilish, iqtisodiyotni raqamlashtirish va "yashil" texnologiyalarni joriy etishga urg‘u berib rivojlantirish hamda Orolbo‘yi mintaqasini ekologik innovatsiyalar va texnologiyalar zonasiga aylantirish yo‘nalishidagi loyihalar va tashabbuslar bilan boyitish taklif qilindi.
