“Metan zapravka” qurishga ruxsat yo‘q. Borlariga gaz yetkazib bera olishmayapti” – Jamshid Xo‘jayev

Bosh vazir o‘rinbosari Jamshid Xo‘jayev hukumat vakillarining Qoraqalpog‘iston Respublikasida tadbirkorlar bilan o‘tkazgan uchrashuvida “metan zapravka” qurishga ruxsat yo‘qligini eslatdi.

Uchrashuv davomida Amudaryo tumanilik tadbirkor avtomobillar uchun elektr, gaz va benzin quyish shoxobchasini qurishni rejalashtirgani, buning uchun 2024 yilda yer olgani hamda qurilishga doir barcha hujjatlar ekspertizadan o‘tkazilganini bildirdi.

Uning so‘zlariga ko‘ra, qurilishni boshlash uchun Energetika vazirligidan ruxsat olish borasida muammoga duch kelgan.

Bosh vazir o‘rinbosari Jamshid Xo‘jayev bunga javoban, mas’ullar ishlab turgan “zapravka”larga ham gaz yetkazib bera olmayotganini aytdi.

“Hozir metan gaz zapravka qurishga ruxsat yo‘q. Bor metan zapravkalarga bular gaz yetkazib bera olmayapti. Buni tadbirkorlarga aytmaganmisizlar?” deya savol berdi u Qoraqalpog‘iston Respublikasi Vazirlar kengashi raisi Farhod Ermanovga.

Jamshid Xo‘jayev tadbirkorga “metan zapravka” qurmaslik kerakligini ta’kidladi.

“Qurganingiz bilan pulingiz shunday yotadi. Sizga metan bermaydi. Qurilishni boshlamaslik kerak. Nega buni hokimiyat aytmaydi?” dedi bosh vazir o‘rinbosari.

“Hokimlarning ham, muovinlarining ham xabarlari bor. Tadbirkorlarga ham bu masala bo‘yicha aytganmiz. O‘tgan yildan boshlab metan zapravka qurilishiga taqiq qo‘yilgan. Hech qanday ruxsat yo‘q”, dedi bunga javoban Farhod Ermanov.