O‘zbekiston va YeTTB 924 mln dollarlik 8 ta investitsiya loyihasini ishlab chiqdi

Joriy yil 27 sentabr kuni O‘zbekiston bosh vaziri o‘rinbosari – investitsiyalar va tashqi savdo vaziri Jamshid Xo‘jayev YeTTB vitse-prezidenti Yurgen Rigterink boshchiligidagi Yevropa tiklanish va taraqqiyot banki delegatsiyasini qabul qildi.

Foto: Getty Images

Uchrashuvda investitsiyaviy hamkorlik masalalari ko‘rib chiqildi. 2018 yildan hozirgi kungacha YeTTB O‘zbekistonda energetika, suv ta’minoti va qattiq chiqindilarni qayta ishlash yo‘nalishlarini rivojlantirish sohalarida 13 ta loyihani amalga oshirmoqda.

Ishlab chiqilayotgan yangi investitsiya loyihalari portfeli umumiy qiymati 924 million dollarlik 8 ta loyihadan iborat. Tomonlar joriy va yangi loyiha tashabbuslarini jadal rivojlantirish bo‘yicha keyingi hamkorlik formatini belgilab oldi.

O‘zbekistonda davlat korxonalarini xususiylashtirish va kapital bozorini rivojlantirish kabi ustuvor iqtisodiy va tarkibiy islohotlarni YeTTB tomonidan qo‘llab-quvvatlash istiqbollari muhokama qilindi.

Mavzu bo‘yicha olib borilgan muzokarada bank rahbariyati mamlakatda amalga oshirilayotgan tarkibiy o‘zgarishlar izchilligi va o‘z vaqtidaligini yuqori baholab, ularni ro‘yobga chiqarish borasida o‘zaro hamkorlikni mustahkamlashga tayyorligini bildirdi.