Qirg‘izistonda blogerlar va ijtimoiy tarmoq foydalanuvchilari OAVga tenglashtirilishi mumkin

Qirg‘iziston prezidenti ma’muriyatining axborot siyosati xizmati «Ommaviy axborot vositalari to‘g‘risida»gi yangi qonun loyihasini jamoat muhokamasiga qo‘ydi, deb xabar berdi 24.kg.

Qonun bilan internet huquqiy jihatdan tartibga solinadi. Ya’ni internetda axborot tarqatayotgan barcha, xususan, blogerlarga OAV maqomi beriladi.

Nashrning qayd etishicha, bu me’yor ijtimoiy tarmoqlar foydalanuvchilariga ham taalluqli, chunki ular ham internetda axborot tarqatadi.

Qonunga ko‘ra, xorijliklar ommaviy axborot vositasiga muassislik qila olmaydi.

2023 yil 1 iyunga qadar mamlakatda OAVni qayta ro‘yxatdan o‘tkazish taklif qilinmoqda. Bu muddatgacha qayta ro‘yxatdan o‘tmagan OAV faoliyatini to‘xtatgan deb hisoblanadi.