Ozod etilgan Limandan kadrlar, Ukraina sharqida vayron bo‘lgan ko‘priklar. Urush suratlari

3 oktyabr kuni Ukraina qurolli kuchlari Xerson oblastidagi qator aholi yashash manzillarini ozod etdi. Volodimir Zelenskiyning so‘zlariga ko‘ra, bular Arxangelskoye va Mirolyubovka qishloqlari (rossiyalik harbiy muxbirlarga ko‘ra, gap Dnepr daryosi bo‘ylab 25 kilometr janubga siljish haqida ketmoqda). Rossiya Davlat dumasi Ukraina hududlarini «RF tarkibiga qo‘shib olish» to‘g‘risidagi kelishuvni ratifikatsiya qildi. So‘nggi kunlarda Rossiyaning turli hududlarida safarbar qilinganlar o‘limi bilan bog‘liq holatlar qayd etilmoqda, kamida ikki kishi o‘z joniga qasd qilgan.

Quyida 3 oktyabr, urushning 222-kunida Ukrainaning turli hududlarida olingan suratlar.

Liman ozod etilgandan keyin

Limanning tepalikdan ko‘rinishi. Donetsk oblastidagi bu shahar ozod etilgani 1 oktyabr kuni ma’lum bo‘ldi. RF mudofaa vazirligi «qurshovga tushib qolish xavfi tufayli» ushbu shahardagi Rossiya qo‘shini «yanada afzalroq marraga olib ketilgani»ni bildirgan.
Narciso Contreras / Anadolu Agency / ABACAPRESS / ddp images / Vida Press

Limanlik kishi vayronaga aylangan uylar hovlisida suv olmoqda. Urushga qadar bu yerda 20 ming kishi yashagan. Rossiya qo‘shini uni iyun oyi boshida egallagan.
Evgeniy Maloletka / AP / Scanpix / LETA

O‘z qismi pozitsiyasida soch kaltalatayotgan ukrain harbiylari
Evgeniy Maloletka / AP / Scanpix / LETA

Ukraina armiyasi askarlari mopedda yo‘l yoqasida yotgan rossiyalik harbiylar jasadlari yonidan o‘tmoqda
Evgeniy Maloletka / AP / Scanpix / LETA

Ukrain harbiylari o‘zlarining halok bo‘lgan safdoshlarini izlamoqda.
Evgeniy Maloletka / AP / Scanpix / LETA

Dam olayotgan ukrain askari
Evgeniy Maloletka / AP / Scanpix / LETA

Liman olingach, Ukraina harbiylarining keyingi maqsadi Luhansk oblasti hududlari bo‘lishi mumkin. Rossiya bu hududlarni 2022 yil bahori va yozida bosib olgandi.
Evgeniy Maloletka / AP / Scanpix / LETA

Izyumdagi qiynoq kameralari. Yevgeniy Maloletka olgan fotosuratlar

Yevgeniy Maloletka — Associated Press (AP) agentligi uchun ishlovchi ukrainalik fotograf. Uning suratlari — jumladan Mariupoldagi tug‘uruqxonaga aviazarba berilishidan keyin olingan suratlar — urushning asosiy kadrlariga aylangan. Sentyabr oyida Maloletka va AP muxbirlari ukrain qo‘shinlari tomonidan ozod etilgan Izyum shahriga yo‘l olishdi. Shaharda ular rossiyalik harbiylar tinch aholi vakillarini qiynoqqa solishda foydalangan o‘nlab obektlarni (jumladan politsiya uchastkasi va ikki maktab) aniqlagan. Bunga qadar qiynoq izlari bo‘lgan jasadlar ko‘milgan ommaviy qabrlar aniqlangandi.