Qrim tatarlari ataylab va noqonuniy ravishda Rossiyaning Ukrainaga qarshi harbiy agressiyasida ishtirok etmoqda, deb xabar qildi Yevropa diplomatik xizmati Rossiyada kuzgi muddatli harbiy xizmatga chaqiruv boshlangan kuni.
Yevropa tashqi siyosat xizmati (EEAS) Rossiya tomonidan annexia qilingan Qrimda Rossiya harbiy xizmatga chaqiruv kampaniyasi boshlanganini tanqid qildi. 1 noyabr, seshanba kuni Bryusselda EEAS vakili «bugungi harakat Rossiya tomonidan yana bir xalqaro huquq buzilishidan dalolat beradi» dedi. U Rossiya noqonuniy ravishda annexia qilingan Ukraina hududlarida inson huquqlarini himoya qilishni ta’minlashi kerakligini, sababi BMTga a’zo ekanini, BMT Xavfsizlik Kengashining doimiy a’zoligi esa unga alohida mas’uliyat yuklashini ta’kidladi.
Shu bilan birga, Bryussel qrim-tatarlarning huquqlari poymol etilishini qayd etdi. Bu xalq vakillari «Rossiyaning safarbarlik to‘g‘risidagi farmonini bajarish chog‘ida qasddan va nomutanosib ravishda ta’qib qilinmoqda», shuningdek, «Rossiyaning Ukrainaga qarshi harbiy agressiyasiga zo‘rlik bilan jalb qilinmoqda», deyiladi bayonotda.
Yevropa idorasi Yevropa Ittifoqi Qrim va Sevastopolning annexia qilinishini tan olmasligini, shuningdek, Ukrainaning Donetsk, Luhansk, Zaporijjya va Xerson viloyatlarining annexia qilinishini rad etishini va so‘zsiz qoralashini ta’kidladi. «Bu hududlarning barchasi Ukraina bo‘lib qoladi», — deyiladi bayonotda. Unda aytilishicha, «Yevropa Ittifoqi Ukrainaning xalqaro tan olingan chegaralari doirasidagi mustaqilligi, suvereniteti va hududiy yaxlitligini qat’iy qo‘llab-quvvatlashda davom etadi va Rossiyadan Ukrainaning butun hududida xalqaro huquqning barcha buzilishini to‘xtatishni hamda qo‘shinlari va harbiy texnikasini zudlik bilan, to‘liq va so‘zsiz olib chiqib ketishni talab qiladi».
Shu kuni Rossiyada 31 dekabrgacha davom etadigan kuzgi muddatli harbiy xizmatga chaqiruv boshlandi. Mamlakatda 120 ming kishi muddatli harbiy xizmatga chaqiriladi. 2022 yilning kuzgi chaqiruvi 21 sentabrda e’lon qilingan «qisman safarbarlik» tufayli bir oydan keyin boshlandi.
Rossiya Bosh shtabining asosiy tashkiliy-safarbarlik boshqarmasi boshlig‘i Yevgeniy Burdinskiy ommaviy axborot vositalariga bergan intervyusida kuzgi chaqiruv askarlari «DXR», «LXR», Zaporijjya va Xerson viloyatlarida xizmat qilish uchun yuborilmasligini aytdi. Ular Ukrainadagi «maxsus harbiy operatsiya»da ham ishtirok etmaydi. Ayni paytda, Amerika urushni o‘rganish instituti (ISW) ekspertlari 30 oktyabr kungi hisobotida kuzgi chaqiruvga chaqiriluvchilar kelasi bahorda Ukrainadagi urushga jo‘natilishini istisno qilmayapti. Ular, shuningdek, safarbarlikning yangi bosqichi e’lon qilingan taqdirda, harbiy xizmatni tugatgandan so‘ng armiya safiga safarbar qilinadi, deydi ISW.
Mudofaa vaziri Sergey Shoygu Rossiya prezidenti Vladimir Putinga hisobot berganidek, Rossiya Federatsiyasida safarbarlik 28 oktabr kuni yakunlandi. Shu bilan birga, Putin tegishli farmonni imzolamadi. 31 oktyabr kuni u alohida farmon zarurligi haqida «o‘ylamaganini» aytdi va bu masalani «huquqshunoslar bilan» muhokama qilishga va’da berdi. 1 noyabr kuni esa prezident matbuot kotibi Dmitriy Peskov safarbarlikni yakunlash bo‘yicha hech qanday farmon bo‘lmasligini aytdi.
