Kuchli yomg‘irlar tufayli Qashqadaryo va Samarqand viloyatida sellar oqdi

Ijtimoiy tarmoqlarda kuchli yomg‘irlar tufayli Qashqadaryo va Samarqand viloyatlarining bir qancha hududlarida sel oqqani tasvirlangan videolar tarqaldi.

Jumladan, Qashqadaryo viloyati Chiroqchi tumanida joylashgan Jambil qishlog‘idan ko‘chalarni to‘ldirib sel oqqan. Bundan tashqari, M-39 Almati-Toshkent-Termiz xalqaro avtomobil yo‘lining Bulung‘ur tumanidan o‘tgan qismini suv bosgan.

2022 yil 19 oktyabr kuni ham M-39 xalqaro avtomobil yo‘lining Bulung‘ur tumanidan o‘tgan qismini sel bosgandi. O‘shanda O‘zgidromet 18 va 19 oktyabr kunlari oralig‘ida Samarqand viloyatida sutka davomida 36 millimetrgacha yomg‘ir yog‘ib o‘tganini ma’lum qilgandi.

Bundan bir necha kun avval kuchli yog‘gan yomg‘irlar tufayli Qashqadaryo viloyatining tog‘li tumanlarida, daryo va soylarda sel oqqandi.

Ma’lumot uchun, O‘zgidromet joriy yilning 6-8 noyabr kunlari kutilayotgan kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfini e’lon qilgandi.