YeI: Ukrainaning ittifoqqa kirishiga tayyorgarlik uchun yillar kerak bo‘ladi

Yevrokomissiya Ukrainaning yaqin kelajakda Yevropa Ittifoqiga qo‘shilishini kutmaydi. «Yevropa Ittifoqining ichki bozorida va boshqa ko‘plab muhim siyosat sohalarida ishtirok etishga tayyorgarlik ko‘rish uchun zarur bo‘lgan keng ko‘lamli ishlarni hisobga olsak, qo‘shilish uchun to‘liq tayyorgarlik bir yoki ikki yildan ko‘proq vaqtni oladi», dedi kengayish va qo‘shnichilik siyosati bo‘yicha Yevropa komissari Oliver Varxeyi Germaniyaning Die Welt gazetasiga 6 noyabr, yakshanba kuni bergan intervyusida.

Varxeyi joriy yilning iyun oyida YeI a’zoligiga nomzod maqomini olgan Ukrainaning islohotlarni tezda olg‘a siljish istagini qayd etdi. U bunday istakni ijobiy deb atadi, lekin «yettita islohotning hammasini ham tez amalga oshirib bo‘lmaydi», deb qo‘shimcha qildi. Hozircha, Yevropa komissarining so‘zlariga ko‘ra, hatto Ukrainani qabul qilish bo‘yicha muzokaralarni boshlash jadvalini kelishib bo‘lmayapti.

Shu bilan birga, Ukraina bosh vazirining Yevropa va Yevroatlantika integratsiyasi bo‘yicha o‘rinbosari Olga Stefanishina nashrga mamlakat Yevropa Ittifoqiga kirish jarayonini 2024 yil oxirigacha yakunlashga «qat’iy niyatda» ekanini aytdi. Uning so‘zlariga ko‘ra, Kiyev «o‘z vazifasini bajarmoqda» va allaqachon ko‘plab islohotlarni amalga oshirgan, masalan, korrupsiyaga qarshi kurash va adolat sohasida.

Stefanishina, shuningdek, Boltiqbo‘yi davlatlari va Ukrainaning blokka tezlashtirilgan qo‘shilishini qo‘llab-quvvatlovchi boshqa yaqin ittifoqchilarning fikriga ishora qiladi. Varxeyi, o‘z navbatida, boshqa barcha nomzodlarga nisbatan xuddi shunday mezonlar Ukrainaga nisbatan qo‘llanishi kerakligini ta’kidlaydi.