Ukraina so‘nggi yil davomida 13 million birlik qurol oldi 

Ukraina Mudofaa vazirligi hisobotiga ko‘ra, bu raqamga sotib olingan raketalar, artilleriya tizimlari va o‘q-dorilar ham kiradi. 

Vazirlik hisobotidan Ukrainada ishlab chiqarilgan qurollar ham joy olgan, xususan, unda tankka qarshi «Korsar» va «Skif» tizimlari, MiG-29MU1 samolyotlari, Mi-8-MSB-V vertolyotlari va «Neptun» qirg‘oq-raketa tizimi bor. 

Hujjatda aytilishicha, fevral oyida Ukrainada harbiy harakatlar boshlangan paytda qurollarning atigi 10 foizi yangi yoki modernizatsiya qilingan holatda bo‘lgan. Artilleriya snaryadlari va minalar esa uzog‘i bilan 1,5 oyga yetgudek darajada edi. 

Sentyabr oyida Ukraina Moliya vazirligi 24 fevraldan buyon xalqaro hamkorlardan 18 milliard dollarga yaqin moliyaviy yordam olgani haqida xabar bergan edi. Bu qiymatga Ukraina Qurolli kuchlariga boshqa davlatlar tomonidan yetkazib berilgan qurol-yarog‘ narxi kirmagan.