O‘zbekiston shaxmatchilari jahon chempionati finaliga chiqdi

Quddus shahrida shaxmat bo‘yicha milliy jamoalar o‘rtasida FIDe jahon chempionati davom etmoqda.

Foto: O‘zbekiston shaxmat federatsiyasi

O‘zbekiston shaxmatchilari yarimfinalda Hindiston bilan bellashib, 2 ta raund (2:2 va 2,5:1,5) yakuniga ko‘ra g‘alaba qozonishdi.

Endi shaxmatchilarimiz 25 noyabr kuni finalda Xitoy milliy jamoasi bilan bellashadi.

Jahon chempionatida O‘zbekiston milliy jamoasi sharafini GM Nodirbek Yoqubboyev, GM Javohir Sindarov, GM Jahongir Vohidov, GM Shamsiddin Vohidov, IM Abdimalik Abdisalimov va IM Ortiq Nigmatov himoya qilmoqda. Shaxmatchilarimizga niderlandiyalik Ivan Sokolov sardorlik va murabbiylik qilyapti.

Avvalroq, O‘zbekiston milliy jamoasi jahon chempionatining guruh bosqichida AQSh (2,5-1.5), Isroil (2,5-1,5) va Hindistonni (3,5-0,5) mag‘lub etib, Polsha (2:2) bilan durangga erishib, Ozarboyjonga (1,5-2,5) yutqazgan edi. Bu natijalar shaxmatchilarimizga guruhda birinchi o‘rin bilan chorakfinalga chiqish uchun yetarli bo‘ldi.

So‘ngra, O‘zbekiston shaxmatchilari chorakfinalda Ukraina bilan bellashib, 2 ta raund (3:1 va 2,5:1,5) yakuniga ko‘ra g‘alaba qozonishgan edi.