«Oddiy odamning o‘g‘li yoki qizi porasiz borib, kirib ketyaptimi-yo‘qmi? Kirib ketyapti» - Prezident ta’lim sohasiga Finlandiya tajribasi joriy etilishi haqida

Davlat rahbari muloqot davomida ta’lim sohasiga Finlandiya tajribasining joriy etilishi haqida ham gapirib o‘tdi.

«Hozir ta’lim sohasida 1-, 2-, 3-, 4-sinflarning kitoblarini ko‘rdingiz. Men aytganimdek, Finlandiyadan mutaxassislar olib kelindi, ular bilan hamkorlik amalga oshirildi, Finlandiyaning oliygohini ochdik, ular bizga hamkor bo‘lyapti. 

Endi muallimlarni ham boshqa joyda o‘qitib emas, o‘zimizga olib kelib o‘qityapmiz. O‘zimizda u kitoblarda o‘qiganidan keyin, u kitoblarning ma’qulligini mualliflarning o‘zlari ham rozi bo‘lib aytyapti: “Bu kitob bizga juda ma’qul”, “Bu kitob dunyoqarashini o‘zgartiradi”, deb.

Tasavvur qilinglar, shu maktablardan 10 yildan keyin qanday bolalar chiqadi. Mana, porasiz ham hamma narsani qilsa bo‘lar ekan-ku. Oddiy odamning o‘g‘li yoki qizi porasiz borib, kirib ketyaptimi-yo‘qmi? Kirib ketyapti. Bu ham inson qadri», dedi davlat rahbari.

Ma’lumot uchun, O‘zbekistonda Finlandiya ta’lim metodikalariga asoslangan ta’limni respublika umumta’lim maktablarida bosqichma-bosqich joriy etish ishlari boshlangan.