Rossiya qo‘shinlari ZAESdan olib chiqilishi haqidagi ma’lumot rad etildi

Zaporijjya atom elektr stansiyasi Rossiya nazorati ostida qolmoqda, deb ma’lum qildi Energodar «ma’muriyati». 

Bundan tashqari, bayonotda ZAES uchun zaxira quvvat manbasini yaratish, Energodar aholisini issiqlik bilan ta’minlash uchun ikkita energoblokni issiq o‘chirish rejimiga o‘tkazish bo‘yicha ishlar va xodimlarni Rossiya boshqaruv tashkiloti yurisdiksiyasiga o‘tkazish rejalariga ishora qilingan.

Kiyev kuni kecha rus qo‘shinlari ZAESdan yaqinda olib chiqilishi ehtimoli borligini bildirgandi.

Bundan oldin Atom energiyasi bo‘yicha xalqaro agentlik rahbari Rafael Grossi Rossiya nazorati ostidagi Zaporijjya atom elektr stansiyasida «yadro reaktorlari yaqinida xavfli darajada ro‘y bergan» portlashlarni o‘ta xavfli deb atagandi.

Grossining so‘zlariga ko‘ra, «gap kilometrlar haqida emas, balki metrlar haqida ketayotganini» nihoyatda xavotirli.

«Ushbu yirik AES hududida portlashlar sodir bo‘ldi, buni mutlaqo qabul qilib bo‘lmaydi. Buning ortida kim turganidan qat’i nazar, zudlik bilan to‘xtatish kerak. Ko‘p marta aytganimdek, ular olov bilan o‘ynashmoqda», - dedi Grossi. 

AEXA hisobotida aytilishicha, dushanba kuni agentlik xodimlari atom elektr stansiyasining xavfsizligini tekshiradi. Biroq, «Rosenergoatom» inspektorlarga cheklovlar qo‘ygan.

«Agar ular yadroviy xavfsizlikka hech qanday aloqasi bo‘lmagan obektni tekshirishni istasalar, ularga rad javobi beriladi», dedi «Rosenergoatom» rahbari maslahatchisi Renat Karchaa TASS’ga.