O‘zbekistonning Islomoboddagi elchisi Oybek Usmonov Pokiston iqtisodiy aloqalar vaziri birinchi o‘rinbosari Kozim Niyoz bilan uchrashdi, deb xabar bermoqda “Dunyo”.
Suhbat chog‘ida Termiz-Mozori Sharif-Kobul-Peshovar transafg‘on temiryo‘li qurilishi masalalari, Savdo-iqtisodiy hamkorlik bo‘yicha ikki tomonlama hukumatlararo komissiya bo‘lajak majlisi kun tartibi, iqtisodiy va investitsiyaviy hamkorlik istiqbollari muhokama qilindi.
Pokiston vakili mamlakatlar o‘rtasidagi strategik sheriklik amaldagi darajasini yuqori baholab, tovar ayirboshlash va o‘zaro investitsiyalar hajmini oshirish maqsadida mintaqaviy o‘zaro bog‘liqlik loyihalarini birgalikda amalga oshirishga tayyorlik bildirdi.
O‘zbekiston Pokistonning mintaqadagi o‘ta muhim strategik iqtisodiy hamkori ekani ta’kidlandi. Islomobod va Toshkent mintaqaviy hamkorlik, iqtisodiy o‘zaro bog‘liqlik va tranzit savdosini rivojlantirish borasidagi pozitsiyalari va manfaatlari to‘liq mos keladi.
