Pokiston sobiq bosh vaziri Imron Xon va uning rafiqasi yana 17 yilga ozodlikdan mahrum qilindi

Pokiston sudi qamoqda jazo o‘tayotgan sobiq bosh vazir Imron Xonga yana 17 yil ozodlikdan mahrum qilish jazosini tayinladi, deb xabar berdi Dawn nashri.

Uning turmush o‘rtog‘i Bushra Bibiga nisbatan ham xuddi shunday hukm chiqarildi.

Tergov ma’lumotlariga ko‘ra, Xon 2021 yil may oyida Saudiya Arabistoni hukumatidan zargarlik buyumlarini sovg‘a sifatida olgan, ularni davlat xazinasiga topshirish o‘rniga asl qiymatidan 14 baravar arzon narx evaziga o‘zida olib qolgan.  

Xon va uning turmush o‘rtog‘iga jarima ham tayinlangan bo‘lib, agar ular jarimani to‘lay olishmasa, qamoqda yanada uzoqroq muddat qolishadi. 

Pokiston axborot vaziri Attaulla Tararning ma’lum qilishicha, ular avval tayinlangan jazo muddati tugashi bilan yangi muddatni o‘tashni boshlashadi. Sud korrupsiya ishi bo‘yicha 2025 yil yanvarda Xonni 14 yilga, uning rafiqasini 7 yilga ozodlikdan mahrum qilgandi.