«Mantiqqa zid va so‘z erkinligiga tahdid» - bank OAVdan 15 mlrd so‘m tovon talab qilgani tanqidlarga sabab bo‘ldi

Davletov.uz kanali muallifi Qobil Hidirov masalasini sud orqali hal qilish to‘g‘ri yo‘l ekani, lekin ma’naviy zarar uchun buncha pul so‘rashni saytni butunlay xonavayron qiladigan g‘arazli yondashuv, deb hisoblashini bildirgan.

«Men sayt faoliyatini qo‘llab-quvvatlamasligim mumkin, lekin Anorbank talab qilayotgan summani ilojsiz, so‘z erkinligini bo‘g‘ishga qaratilgan buzg‘unchi harakat deb bilaman. Agar bank ishchanlik obro‘sini tiklamoqchi bo‘lganida – shartli 1 so‘mni ma’naviy zarar sifatida belgilar edi. Bank noto‘g‘ri yo‘ldan yurdi. Agar bank o‘z pozitsiyasini o‘zgartirmasa, mijoz sifatida bankni o‘zim uchun boykot qilaman.

Albatta, sud ma’naviy zararni hisoblashning amaliyotini biladi, bu borada bank o‘ylagan summa chiqmaydi», – deydi bloger.

Jurnalist va bloger Eldor Asanov ham bu kabi mojarolar sud orqali hal qilinishi to‘g‘ri yo‘l ekanini ta’kidlab, ilgari OAVning ovozi do‘q-po‘pisa bilan o‘chirilishini eslatgan. Lekin, bank talab qilayotgan summa sha’nini himoya qilish uchun emas, balki nashrni yopib yuborish istagidek ko‘rinadi, deydi jurnalist.

«Anorbank nashrdan undirib berishni talab qilayotgan summa mantiqqa ziddir; bank shunchaki sha’nini himoya qilishni emas, nashrni qarzga botirib, yopib yuborishni istayotgan ko‘rinadi. Bunisini shubhasiz so‘z erkinligiga tahdid deb baholasa bo‘ladi.

Xorij tajribasida nashr bilan sudlashish holatlari ko‘p uchraydi, ammo undiriladigan moddiy zarar miqdori juda katta bo‘lishi jamoatchilikning noroziligiga sabab bo‘ladi», – deya yozdi Asanov.

Uning fikricha, sotsial adolatni xohlaydigan tashkilot yoki tuzilma o‘ziga qarshi uyushtirilgan axboriy xurujni jazolashga harakat qilishi – OAV ochiqligiga qarshi bo‘lmasligi kerak.

Inson huquqlari faoli Abdurahmon Tashanov bu holatda asl maqsad mijozga xizmat ko‘rsatishdan ko‘ra ko‘proq so‘z erkinligi tamoyillariga bolta urish ekanini aytgan.

«Albatta, bu jarayon huquqiy jamiyatga xos amaliyot, ammo masalaga chuqurroq qaralsa, sirkasi suv ko‘tarmaydigan bunday muassasaning asl maqsadi mijozga xizmat ko‘rsatishdan ko‘ra ko‘proq so‘z erkinligi tamoyillariga bolta urish ekani ko‘rinadi.

Bankning bunday kurakda turmas iddaosi sudlarda o‘z isbotini topmasligiga umid qilamiz. Ammo shu o‘rinda ochiq jamiyat tarafdorlarini oshkoralik va plyuralizm tarafida birlashishga chaqiramiz», – deydi Tashanov.

Ma’lumot uchun, 15 oktyabrda Sof.uz nashri «Anorbank»ning «moliyaviy fokuslari» mijozlarni nega g‘azablantirdi?» nomli videoko‘rsatuv e’lon qilgan. Bank bu ko‘rsatuvda o‘z «ishchanlik obro‘siga putur yetkazadigan ma’lumotlar tarqatilgan» deb hisoblashini bildirib, sudga murojaat qilgan. Ayni vaqtda Anorbank sayt ustidan Iqtisodiy sudga da’vo arizasi kiritgan.