Vazirlar Mahkamasi Oliy Majlisdan tugab borayotgan 2022 yilgi davlat budjeti haqidagi qonunni o‘zgartirishni so‘radi. Qonunchilik palatasi 19 dekabr kungi yalpi majlisida bunga rozi bo‘ldi.
Majlisda chiqish qilgan moliya vaziri Temur Ishmetovning aytishicha, eksport qilinadigan mamlakatlarda mahalliy avtosanoat korxonalari to‘laydigan transport xarajatlarini qoplash maqsadida Iqtisodiyot vazirligiga 224,5 mlrd so‘m mablag‘ ajratish ko‘zda tutilgan.
Deputat Doniyor G‘aniyev bunga e’tiroz bildirdi. Uning so‘zlariga ko‘ra, qonun loyihasi bo‘yicha deputatlarga berilgan tushuntirish xatida ajratilayotgan mablag‘lar transport xarajatlarini emas, avtomobillar eksport qilinayotgan mamlakatlarda undiriladigan utilizatsiya yig‘imlarini qoplash uchun deb yozilgan.
“Hozirgi iqtisodiy holat fiskal xarajatlarimizni tartibga solishni, optimallashtirishni talab etyapti. Chunki iqtisodiy o‘sish yil boshidagiday emas. Qolaversa, asosiy eksport qiladigan mahsulotlarimizning narxi tushgan. Geosiyosiy vaziyatni hammamiz bilib turibmiz. Xarajatlarimizni optimallashtirish talab etilayotgan vaziyatda, eksport bilan shug‘ullanayotgan 2ta monopol kompaniyani (UzAuto Motors va SamAuto nazarda tutilmoqda – tahr.) subsidiya bilan qo‘llab-quvvatlayapmiz. Eng yomoni, bu mablag‘lar bilan eksport amalga oshirilayotgan davlatlar aholisining cho‘ntagiga to‘g‘ridan to‘g‘ri pul solyapmiz. Ya’ni utilizatsiya yig‘imini qoplab berish orqali eksportga yo‘naltirilayotgan avtomobilning rossiyalik yoki belaruslik xaridor uchun arzon bo‘lishini ta’minlayapmiz. Bu qanchalik to‘g‘ri va ustuvor?” deya savol qo‘ydi G‘aniyev.
Timur Ishmetov deputatning savoliga “O‘zavtosanoat” vakillari javob berishi kerakligini aytib, ularni izladi, lekin majlisda kompaniya vakillaridan na oflayn, na onlayn hech kim qatnashmayotgani oydinlashdi.
