Qodirov hech qachon Rossiya prezidentligiga nomzodini qo‘ymasligini aytdi

Checheniston rahbari Ramzon Qodirov Rossiyadagi prezidentlik saylovida qatnashish huquqiga ega bo‘lsa-da, hech qachon bunday qilmasligini aytdi.

Foto: RIA Novosti

U amaldagi davlat rahbari Vladimir Putinga uzoq hukmronlik tilab, unga yordam qilishni va’da berdi.

«Men Rossiya fuqarosiman, prezidentlikka nomzod bo‘lishga huquqim bor. Boshqalarga mumkin, chechenlarga mumkinmasmi? Mumkin. Lekin men hech qachon bunday qilmayman... Ayniqsa, dono, uzoqni ko‘ra oladigan, kuchli, iqtidorli, halol, odobli odam boshqarayotgan davlatda... Bunday odamdan keyin rahbarlik qilish, davlatni boshqarish deyarli ilojsiz», dedi Qodirov respublika aholisi bilan bo‘lgan muloqotda Rossiya prezidentligiga nomzod bo‘lishi mumkinligi haqidagi mish-mishlar haqidagi savolga javob berar ekan.

O‘tgan yili Ramzon Qodirov o‘zini na Rossiya prezidenti, na vazir, na federal darajadagi boshqa lavozimda ko‘rmasligini aytgan edi.