Serbiya urush tufayli Rossiyadan uzoqlashishga harakat qilmoqda - Bloomberg

Mamlakat prezidenti Vuchichning Ukrainadagi urush tufayli Putin bilan munosabatlari keskinlashgan.

Vladimir Putin va Aleksandr Vuchich / Foto: EPA

Serbiya prezidenti Aleksandr Vuchich va Rossiya prezidenti Vladimir Putin o‘rtasidagi munosabatlar Ukrainadagi urush boshlanganidan keyin keskinlashdi, deb yozdi Bloomberg.

Serbiya Rossiya Federatsiyasining Yevropadagi eski ittifoqchisi bo‘lishiga qaramay, urush boshlanganidan keyin Rossiyadan har tomonlama uzoqlashishga harakat qilmoqda.

Vuchich rossiyalik hamkasbi bilan bir necha oydan beri muloqot qilmaganini aytib, Serbiya Rossiyaning Ukrainaga qo‘ygan hududiy da’volarini rad etishini ta’kidladi.

«Biz boshidanoq Rossiyaning Ukrainaga bostirib kirishini qo‘llab-quvvatlay olmasligimizni aytdik <...> Biz uchun Qrim - Ukraina, Donbass - Ukraina va shunday bo‘lib qolaveradi», dedi Vuchich seshanba kuni Belgraddagi qarorgohida.

Avvalroq, Vuchich Serbiyada «Vagner» XHK vakillari yo‘qligini ta’kidlab, serblarning urushga yollanishini tanqid qilgandi.