Сербия уруш туфайли Россиядан узоқлашишга ҳаракат қилмоқда — Bloomberg

Мамлакат президенти Вучичнинг Украинадаги уруш туфайли Путин билан муносабатлари кескинлашган.

Владимир Путин ва Александр Вучич / Фото: EPA

Сербия президенти Александр Вучич ва Россия президенти Владимир Путин ўртасидаги муносабатлар Украинадаги уруш бошланганидан кейин кескинлашди, деб ёзди Bloomberg.

Сербия Россия Федерациясининг Европадаги эски иттифоқчиси бўлишига қарамай, уруш бошланганидан кейин Россиядан ҳар томонлама узоқлашишга ҳаракат қилмоқда.

Вучич россиялик ҳамкасби билан бир неча ойдан бери мулоқот қилмаганини айтиб, Сербия Россиянинг Украинага қўйган ҳудудий даъволарини рад этишини таъкидлади.

«Биз бошиданоқ Россиянинг Украинага бостириб киришини қўллаб-қувватлай олмаслигимизни айтдик <...> Биз учун Қрим - Украина, Донбасс - Украина ва шундай бўлиб қолаверади», деди Вучич сешанба куни Белграддаги қароргоҳида.

Аввалроқ, Вучич Сербияда «Вагнер» ХҲК вакиллари йўқлигини таъкидлаб, сербларнинг урушга ёлланишини танқид қилганди.