Germaniya Rossiyaning 5,3 mlrd yevrodan ortiq aktivlarini muzlatib qo‘ydi

Jarima choralari nafaqat Yevropa Ittifoqining sanksiyalar ro‘yxatiga kiritilgan jismoniy shaxslar va kompaniyalarning, balki Rossiya Markaziy bankining mablag‘lariga ham ta’sir ko‘rsatdi, deya xabar beradi Germaniya moliya vazirligi.

Ukrainada urush boshlanganidan beri Germaniyada muzlatilgan Rossiya aktivlarining umumiy miqdori taxminan 5,32 milliard yevroni tashkil qildi. Bu haqda 18 fevral, shanba kuni Germaniya moliya vazirligiga tayanib, Welt am Sonntag haftalik nashri xabar berdi.

Nashrning aniqlik kiritishicha, jazo choralari nafaqat Yevropa Ittifoqining sanksiya ro‘yxatiga kiritilgan jismoniy shaxslar va kompaniyalarning mablag‘lariga, balki Rossiya Markaziy bankiga ham ta’sir qilgan. Rossiyalik oligarxlarga tegishli muzlatilgan pullar miqdori haqidagi haftalik savolini vazirlik javobsiz qoldirdi.

Moliya vazirligi ma’lumotlariga ko‘ra, Sanksiyalarni qo‘llash bo‘yicha yangi markaziy idora (ZfS) hali ham tashkil etilish bosqichida. Ayni paytda u yerda 36 nafar xodim ishlamoqda, biroq xodimlar sonining «doimiy» o‘sishi kuzatilmoqda. «Aktivlarni identifikatsiya qilish kabi ustuvor yo‘nalishlar» uchun tegishli tuzilmalar yaratilmoqda.

O‘tgan yilning dekabr oyida qabul qilingan Germaniyada sanksiyalarni qo‘llash to‘g‘risidagi qonunning ikkinchi qismiga ko‘ra, ZfS mahkama saytida e’lon qilingan muzlatilgan aktivlar reyestrini ham yuritishi kerak. Biroq, bu hali sodir bo‘lmadi.