Oqilbek Japarov va Abdulla Aripov o‘z oldiga 2023 yil uchun maqsad qo‘ydi

Qirg‘iziston Vazirlar Mahkamasi raisi Oqilbek Japarov O‘zbekistonga amaliy tashrifi doirasida O‘zbekiston bosh vaziri Abdulla Aripov bilan muzokaralar o‘tkazdi. 

Kaktus.media xabariga ko‘ra, suhbat chog‘ida savdo-iqtisodiy, sarmoyaviy, suv energetikasi, transport-kommunikatsiya, madaniy-gumanitar va boshqa sohalardagi ikki tomonlama hamkorlik masalalari muhokama etilgan. 

Shuningdek, O‘zbekiston prezidenti Shavkat Mirziyoyevning 2023 yil 26-27 yanvar kunlari Qirg‘izistonga davlat tashrifi chog‘ida erishilgan kelishuvlar ijrosi haqida so‘z yuritildi. 

Japarov va Aripov 2023 yilda o‘zaro tovar ayirboshlash hajmini 2 milliard dollarga yetkazishga tayyorligini bildirdi. 

O‘zbekiston bosh vaziri Qirg‘iziston-O‘zbekiston strategik sherikligini mustahkamlash va kengaytirish, tomonlarni qiziqtirgan barcha sohalarda o‘zaro manfaatli hamkorlikni rivojlantirish istagini tasdiqladi. 

«O‘zaro tovar ayirboshlashda 2 milliard dollarlik ko‘rsatkichga erishish va yirik qo‘shma loyihalar, xususan, Qambar-Ota 1 GES, «Xitoy-Qirg‘iziston-O‘zbekiston» temiryo‘li qurilishini tezkorlik bilan amalga oshirish tarafdorimiz», dedi Aripov.