Bolgariya Belarusdagi yadroviy qurol haqidagi so‘zlardan keyin muzokaralarga chaqirdi

Bolgariya vitse-prezidenti Iliyana Yotova Rossiya prezidenti Vladimir Putinning Belarusda Rossiya yadro qurolini joylashtirish haqidagi bayonoti munosabati bilan Rossiya va Ukraina o‘rtasida muzokaralar o‘tkazishga chaqirdi. Bu haqda 26 mart, yakshanba kuni dpa agentligi xabar berdi.

Yotovaning so‘zlariga ko‘ra, vaziyat «borgan sari xavfli va qo‘rqinchli» bo‘lib bormoqda, shuning uchun u va Bolgariya prezidenti Rumen Radev bir necha bor muzokara o‘tkazishga chaqirishgan. «Bu quruq so‘zlar emas», deb ta’kidladi Yotova va barcha mamlakatlarda qurolning ko‘pligi oldindan aytib bo‘lmaydigan qarorlarga olib kelayotgani hamda amalda jiddiy urush xavfi borligini qo‘shimcha qilib o‘tdi.

«Umid qilamanki, bu aql-idrok hali g‘alaba qozonadi va gap haqiqiy harakatlardan ko‘ra ko‘proq tahdidlar haqida boryapti», - deya qo‘shimcha qildi Yotova.

Bir kun avval Putin Rossiyaning Belarusda taktik yadro qurolini joylashtirishini aytgan edi. Uning so‘zlariga ko‘ra, gap taktik yadro qurolini tashishga qodir 10 ta samolyot va «Iskandar» raketa tizimi haqida ketmoqda. Bundan tashqari, 2023 yil iyul oyida Belarusda taktik yadroviy qurollarni saqlash ombori qurilishi yakunlanadi, dedi Putin. 

Uning qo‘shimcha qilishicha, Rossiya Belarusga qurol bermayapti, faqat ularni joylashtirmoqda, demak, bu qadam yadro qurolini tarqatmaslik haqidagi kelishuvni buzmaydi. Uning so‘zlariga ko‘ra, Rossiya AQSh NATO mamlakatlarida «o‘nlab yillar davomida qilgan ishni amalga oshiryapti» - taktik yadro qurollarini joylashtirmoqda.