«Barsa» «Real»ning umidlarini o‘ldirdi, Angliyada anomal hisob va chayon uslubida gol. Yevropada kun o‘yinlari

Angliya: «Tottenhem»ning qora kuni

APL. 32-tur
Nyukasl – Tottenhem 6:1
Gollar: 1:0 – 2 Merfi, 2:0 – 6 Joelinton, 3:0 – 9 Merfi, 4:0 – 19 Isak, 5:0 – 21 Isak, 5:1 – 49 Keyn, 6:1 – 67 Uilson.
Nyukasl – Poup, Tripper (Mankilo, 70), Sher (Lassels, 74), Botman, Bern, Bruno Gimaraes (Gordon, 70), Longstaff, Uillok, Merfi (Almiron, 66), Joelinton, Isak (Uilson, 66).
Tottenhem – Lioris (Forster, 46), Porro, Dayyer, Romero, Perishich, Heyberg, Skipp, Sarr (Sanches, 23), Kulusevski (Danjuma, 72), Son Hyong Min (Risharlison, 83), Keyn.

Chempionlar ligasiga yo‘llanma beruvchi kuchli to‘rtlik uchun kurash istalgan ssenariyda kechishi mumkin edi. Ammo amalda ro‘y bergan voqealarni hech kim kutmagandi, hech kim «Tottenhem» oyoqosti qilinishi va ekspress-rejimda tahqirlanishini taxmin qilmagandi. Ikkinchi daqiqada 1:0, to‘qqizinchi daqiqada 3:0, 21-daqiqada 5:0... Rotatsiya futbolchisi bo‘lgan Merfi bu oraliqda mavsumning shu vaqtgacha bo‘lgan qismida urganidan ikki barobar ko‘p gol urdi.

Hatto statistika ham voqealar rivojiga bazo‘r ulgurdi, ammo hayratlanarli faktlar yuzaga chiqdi. Masalan, «shporlar» bungacha APLda oxirgi to‘qqiz yil muqaddam beshta gol o‘tkazgan - aynan shu jamoadan. O‘shanda ligada jon saqlab qola olmagan «qarg‘alar» so‘nggi turda eshikni qattiq yopib ketishga qaror qilishgandi (5:1). Faqat 2016 yil mayida londonliklarda turnir motivatsiyasi yo‘q edi, hozir esa barchasi butunlay boshqacha. Biroq mezbonlarning olti zarbasidan beshtasi golga aylandi va Kristian Stellini uch markaziy himoyachi bilan o‘ynay boshladi.

Lekin bu hisob yanada yiriklashib ketishining oldini olishga qaratilgan chora edi. Bundan tashqari, tanaffusda ruhiy holatini asrash uchun Lioris almashtirildi. Yagona «plyus» — agar bu so‘zni «Tottenhem»ning yakshanba kungi o‘yinida qo‘llash mumkin bo‘lsa — jamoa qisqa vaqt ichida ko‘p gol o‘tkazish bo‘yicha turnir tarixidagi eng yomon jamoaga aylanmadi. Qayg‘uli rekord hamon «Uotford»ga tegishli bo‘lib qolmoqda — o‘shanda «Manchester Siti»ga qarshi o‘yinda —18-daqiqaga kelib hisob 0:5 ko‘rinishini olgan, qolgan vaqt davomida yana uchta gol urilgandi. Lekin bu londonlik muxlislarga taskin bera olmaydi, besh yil ichidagi eng yaxshi mavsumini o‘tkazayotgan Keynning 24-goli esa unga obro‘ keltirmasligi aniq. Qolaversa, o‘yindagi so‘nggi so‘zni baribir «Nyukasl» aytdi. Endi Eddi Hau jamoasi zaxirasida bitta o‘yin bor holida «shporlar»ni 6 ochkoga ortda qoldirdi va amalda YeChL yo‘llanmasini hal qildi.

Bornmut – Vest Hem 0:4
Gollar: 0:1 – 5 Antonio, 0:2 – 12 Lukas Paketa, 0:3 – 43 Rays, 0:4 – 72 Fornals.
Bornmut – Neto, Smit (Entoni, 61), Stivens, Kelli (Vinya, 61), Mifem, Taverniye, Lerma (Kuk, 75), Kristi (Uattara, 61), Rotuell (Mur, 46), Billing, Solanke.
Vest Hem – Fabianski, Tsoufal (Kerer, 83), Zuma, Agerd, Kressuell, Souchek, Rays, Lukas Paketa (Dauns, 77), Benrahma (Fornals, 65), Bouen (Korne, 76), Antonio (Ingz, 65).

Turnir jadvalining quyi qismida kurash qizimoqda. Hafta o‘rtasida yevrokubok chorakfinalida «Genk» ustidan yirik hisobda g‘alaba qozonib, Konferensiyalar ligasi yarimfinaliga chiqqan «Vest Hem» o‘tgan turda «Tottenhem»ni safarda mag‘lub etgan «Bornmut» darvozasiga safarda javobsiz to‘rtta gol urdi. Gollarning to‘rtinchisiga chayon uslubida zarba bergan Fornals mualliflik qildi. Endilikda Moyyes shogirdlari xavfli zonadan uzoqlashib oldi (13-o‘rin), «Bornmut»ning esa keyingi turlarda bo‘shashishga haqqi yo‘q.

Angliya kubogi. Yarimfinal
Brayton – Manchester Yunayted 0:0.
Penaltilar seriyasi: 6:7
Brayton – Sanches, Dank, Uebster, Estupinyan, March, Mak Allister, Ensiso (Veltman, 67), Kaysedo, Mitoma, Gross, Uelbek (Undav, 75).
Manchester Yunayted – De Xea, Uan-Bissaka, Shou, Lindelyof, Diogu Dalot, Eriksen (Fred, 62), Kazemiro, Brunu Fernandesh (Vegorst, 101), Antoni, Marsyal (Sancho, 85), Reshford.
Ogohlantirishlar: Kazemiro (36), Shou (53), Mitoma (90), Lindelyof (97).

«Qizil iblislar» Sevilyada o‘tgan yevrokubok o‘yinidan keyin o‘ziga kela olganini ko‘rsatdi. Hatto De Xea o‘zini qo‘lga olgandi. Agar ushbu ispaniyalik posbonning reaksiyasi bo‘lmaganida Erika ten Hag kubok orzusidan asosiy vaqtdayoq umid uzishiga to‘g‘ri kelgan bo‘lardi. «MYu» darvozaboni bir necha vaziyatda qahramonlik ko‘rsatdi, to‘sin ostiga yo‘l olgan to‘pni ham to‘sa oldi.

«Brayton» darvozaboni Sanches ham yaxshi o‘ynadi. Birinchi overtaym oxirida u Reshfordning navbatdagi goli urilishiga yo‘l qo‘ymadi, holbuki bu vaziyatda to‘p himoyachiga tegib, rikoshet orqali darvozaga yo‘l olgandi. Darvozalar bunday qo‘riqlangan holatda penaltilar seriyasi bo‘lishi muqarrar edi, seriya vaqtida esa maydondagi futbolchilar astoydil harakat qilishdi.

Ular 12 ta zarbani bexato ijro etishdi. O‘n uchinchi zarbaga kelganda esa March to‘pni osmonga qarata tepdi. Aftidan, 11 metrlik zarbalar seriyasini boshqacha yakunlab bo‘lmasdi. De Xea anchadan buyon penalti qaytarishda muammolarga ega, u Yevropa Ligasi finalida «Vilyarreal»ga qarshi o‘yinda 11 zarbani o‘tkazib yuborgandi. Ammo bu safar barchasi «qizil iblislar» foydasiga hal bo‘ldi.

Jamoa o‘z tarixida uchinchi bor bir mavsumda ikki kubok turnirida ham finalga chiqmoqda. «MYu» «Nyukasl»dan ustun kelib, Angliya ligasi kubogini allaqachon o‘ziniki qilgan. Endi «Uembli» o‘z tarixida ilk bor Angliya Kubogi finalida Manchester derbisini qabul qiladi.

Ispaniya: Simeonening «Kamp Nou»dagi kompleksi davom etadi

La Liga. 30-tur
Barselona – Atletiko 1:0
Gol: 1:0 – 44 Ferran Torres.
Barselona – ter Stegen, Kunde, Alonso (Erik Garsiya, 61), Arauxo, Balde, Buskets, de Yong (Kessie, 78), Gavi, Rafinya, Ferran Torres (Pedri, 61), Levandovski.
Atletiko – Oblak, Molina, Savich, Ximenes, Ermoso (Regilon, 79), Karrasko, Vitsel (Morata, 59), De Pol, Lemar (Saul, 67), Grizmann, Korrea (Barrios, 59).
Ogohlantirishlar: Alonso (28), Buskets (57), Grizmann (75), Rafinya (78), Savich (80), Ximenes (81), Barrios (83), Regilon (84), Morata (86), Gavi (90).

Zerikarli «Barselona» yorqin «Atletiko»ga qarshi — Yevropa futbolining yakshanba kungi asosiy o‘yini avvaldan shunday qabul qilindi. Shu bilan birga, bu o‘yinda ko‘k-anorranglilar safiga Frenki de Yong qaytdi, Pedri esa zaxira o‘rindig‘ida paydo bo‘ldi. Bu esa jamoa uchun sezilarli darajada kuchayish edi, ammo asosiysi — katalonlar endi chinakamiga tajovuzkor va ishtiyoqmand ko‘rinishardi. Mukammal emas, ammo so‘nggi o‘yinlardagi kabi nursiz ham emas.

De Yongning raqib hududidagi aql bovar qilmas podkati va keyin gazonda yotgan holda bergan zarbasi jamoadagi kayfiyatni yaqqol namoyon etardi. Lekin bu Grizmann ishtirokidagi vaziyatlar kabi golga yaqin vaziyat emasdi. Fransuzning aylanma zarbasini darvoza to‘sini qaytardi. Keyingisini — Ter Shtegenning mahorati. Ammo madridliklarning bu faolligiga ochko yozilmaydi, golni esa baribir «Barsa» urdi.

Hatto yaxshi o‘tkazilgan o‘yinlarda ham tanqid qilinadigan Rafinya o‘ng qanotga uzatilgan to‘pga yetib borib, uni o‘zida saqlab qoldi va markazdan ochilib kelgan Ferran Torresni to‘p bilan ta’minladi. U esa to‘pni himoyachi oyoqlari orasida o‘tkazib, uzoq ustun tomonga aniq yo‘lladi. Qiziq tomoni, Xavi ushbu vingerlar juftligidan 19 bor foydalangan va braziliyalik va ispaniyalik futbolchilar bog‘lami birinchi bor gol tashkillashtirdi.

Ikkinchi bo‘limda esa ikki jamoa futbolchilari vaziyatlarni ko‘kka sovurish bilan mashg‘ul bo‘lishdi. Rafinya bir yarim metrdan gol ura olmadi. Grizmann tovoni bilan darvozabon turgan joyga pas uzatdi. Levandovski esa bo‘sh darvoza qarshisida turgan sherigini to‘p bilan ta’minlashi mumkin bo‘lgan holda, o‘zi zarba berishga qaror qildi va xatoga yo‘l qo‘ydi. Bunday xatolar odatda jazolanadi, ammo «matraschilar» uchun «Kamp Nou»da 17 yildan buyon saqlanib qolayotgan tavqi la’nat davom etdi. Bu Diyego Simeone uchun eng omadsiz stadion bo‘lib qolmoqda. «Atletiko»ning 13 o‘yinlik mag‘lubiyatsiz seriyasiga barham berildi, chempionlik intrigasi uyg‘onishiga bo‘lgan umidlar o‘ldirildi. «Barsa» «Real» bilan oradagi farqni yana 11 ochkoga yetkazib qo‘ydi.

Xavi jamoasida 1:0 hisobidagi g‘alabalar soni 10 taga yetdi. Kamida 1988/89 yillar mavsumida «Valensiya» tomonidan o‘rnatilgan la liga rekordi takrorlanishi mumkin. O‘shanda «ko‘rshapalaklar» jamoasiga 11 o‘yinda g‘alaba uchun bir gol kifoya qilgandi, keyinroq bunday natijalar «Atletiko» (2017/18) va «Sevilya» (2020/21) tomonidan takrorlangandi.

Italiya: Milandagi uyg‘onish

A Seriya. 31- tur
Empoli – Inter 0:3
Gollar: 0:1 – 48 Lukaku, 0:2 – 76 Lukaku, 0:3 – 88 Martines.
Empoli – Perizan, Ebuehi, Luperto (Tonelli, 72), Ismayli, Parizi, Marin, Xaas (Grassi, 65), Bandinelli (Vinyato, 72), Baldansi, Kambyagi (Satriano, 65), Kaputo (Destro, 80).
Inter – Handanovich, Bellanova (Dumfris, 69), de Vrey, D`Ambrozio, Acherbi, Gozens (Dimarko, 77), Brozovich (Barella, 77), Chalxanoglu (Aslani, 87), Galyardini, Korrea (Martines, 69), Lukaku.

Turning yakshanba kungi o‘yinlarini ochib bergan «Inter» Chempionlar ligasi yarimfinalchisi ichki birinchilikda bu qadar yomon natija qayd etmasligini kerakligini tushunib yetgan ko‘rinadi. Nima bo‘lganda ham A Seriyaning so‘nggi besh o‘yinidagi to‘rt mag‘lubiyat — haqiqiy falokat. Qolaversa, «Yuventus»ga — vaqtincha bo‘lsa ham — 15 ochkosini qaytarib berishgan. Natijada oltinchi o‘ringa tushib ketgan «neradzurri»da shunchaki xato qilishga huquq qolmadi va «Empoli»ga qarshi o‘yinda ular nihoyat g‘alabaga erishdi. Lukaku yana avvalgi kabi o‘ynay boshladi, uning ikkita ajoyib zarbasidan keyin jamoa «Milan»ni uning o‘yiniga qadar quvib o‘tib, o‘z o‘yinini dushanba kuni o‘tkazadigan «Roma»ga yaqinlashib oldi.

Milan – Lechche 2:0
Gollar: 1:0 – 40 Rafael Leau, 2:0 – 74 Rafael Leau.
Milan – Menyan, Kalulu, Tomori, Tiav (Ker, 60), Ernandes, Krunich, Braim Dias (de Ketelare, 78), Tonali (Binnosir, 59), Rebich, Rafael Leau (Origi, 79), Junior Messias (Salemakers, 59).
Lechche – Falkone, Jandre (Romanoli, 79), Umtiti, Baskirotto, Gallo, Blen (Gonsales, 76), Yulmand, Banda (Male, 79), Di Franchesko (Espeto, 65), Uden, Sisey (Volkerling, 66).

Lekin kun oxiriga kelib «rossonerilar» turnir jadvalida hamshaharlarini joyiga qaytarishdi. Ular ham birinchi bo‘limda zo‘r berib o‘ynashmadi, ammo hisobni tanaffusga qadar ochishdi. Burchak zarbasi original ijro etilib, Rafael Leau to‘pni uzoq burchakka joylashi bilan yakunlandi. «Lechche» ikkinchi bo‘lim davomida o‘yinini kuchaytirganida, mezbonlarning portugaliyalik ushbu yetakchisi himoyachilarni fintlari bilan dog‘da qoldirib, to‘pni uzoq burchakka yo‘lladi. Mavsumning birinchi qismidagi pasayish va yangi shartnoma atrofidagi bahslardan keyin Leau yana o‘tgan mavsumdagi o‘yinini namoyish etmoqda va gollari sonini 12 taga yetkazib, bir mavsumda urilgan gollar soni bo‘yicha o‘z shaxsiy rekordini o‘rnatdi. «Milan» esa hozircha «Roma» bilan tenglashib oldi, rimliklar kamroq o‘yin o‘tkazgan bo‘lsa ham, to‘plar nisbatiga ko‘ra to‘rtinchi o‘rinni egallab turibdi.

Yuventus – Napoli 0:1
Gol: 0:1 – 90 Raspadori.
Yuventus – Shchensni, Rugani, Gatti, Danilo, Soule (Fadjoli, 66), Kostich (Keza, 61), Rabio, Lokatelli, Miretti (Di Mariya, 61), Kuadrado, Milik (Vlahovich, 90).
Napoli – Meret, Di Lorenso, Jyezus, Kim Min Je, Olivera, Lobotka (Rrahmani, 90), Zambo-Angissa, Ndombele (Zelinski, 68), Losano (Elmaz, 68), Kvaratsxeliya (Raspadori, 86), Osimhen.
Ogohlantirishlar: Lokatelli (23), Rabio (40), 
Fadjoli (85), Di Mariya (89), Zambo-Angissa (90).

«Napoli» Turinda «Yuventus» jamoasini so‘nggi daqiqalarda taslim etdi. Zaxiradan tushgan Elif Elmaz zaxiradan tushgan Raspadorini golli pas bilan ta’minladi. Hakamning final hushtagi yangraganidan so‘ng «Napoli» futbolchilari va xodimlari xuddi skudettoni qo‘lga kiritgandek xursandchilik qilishdi. Ammo buni tushunish mumkin: ular barchaga, jumladan, o‘zlari uchun ham Chempionlar ligasini tark etish ularni sindirib qo‘ymaganini namoyish etishdi — jamoa 1990 yildan buyon ilk titulni bir amallab emas, chiroyli va o‘z uslubida qo‘lga kiritmoqchi.

Endilikda turnir jadvalida ikkinchi o‘rinda kelayotgan «Latsio» bilan oradagi farq 17 ochkoni tashkil etmoqda. Nazariy jihatdan «Napoli» keyingi turda «Salernitana»ni mag‘lub etsa, rimliklar esa safarda «Inter»ni yenga olmasa, chempionlik masalasiga nuqta qo‘yiladi. Agar keyingi turda kerakli natijalar qayd etilmasa ham, ortga hisob boshlangan va keyingi har bir tur Neapol uchun oltin o‘yinga aylanishi mumkin.