«Paxtakor» Toshkentda «Dinamo»ga yutqazdi, OKMK yaqqol peshqadam
|18:44 / 30.03.202513 44311 min
«Sherlar» jamoasi mavsum startida birorta gol urmagan va birorta ochko qo‘lga kiritmagan holda turnir jadvalining so‘nggi pog‘onalarida qolmoqda.
Foto: PFLFoto: PFL
27 martdan 29 martgacha futbol bo‘yicha O‘zbekiston chempionatida 3-tur uchrashuvlari o‘tkazildi.
«Navbahor» – «Andijon» 2:2
Gollar: Zabihillo O‘rinboyev 2, Abbos G‘ulomov 51 – Gilerme Gedesh avtogol 6, Benjamin Teydi 90+7.
«Navbahor» – Umidjon Ergashev, Azimjon Ahmedov (Javohir Abdujabborov, 62), Shohmalik Komilov (Shahzod Toirov, 75), Zabihillo O‘rinboyev (Pedro Augusto, 75), Shahzodbek Ubaydullayev (Alisher Odilov, 62), Saidazamat Mirsaidov, Benjamin Teydi, Sergey Karpovich, Gilerme Gedesh, Abbos G‘ulomov (Ruslan Jiyanov, 80), Igor Gabriel.
«Andijon» – Eldor Adhamov, Islom Mamatkazin, Abdulvohid G‘ulomov, Iskandar Shoyqulov (Altin Kreziu, 68), Mirzad Mehanovich, Islam Mashukov, Abdurahmon Komilov (Doniyor Abdumannopov, 68), Usmonali Ismonaliyev, Muhammadkarim Toirov, Luka Uskokovich, Bektemir Abdumannonov.
Chetlatish: Saidazamat Mirsaidov (90+6) – Mirzad Mehanovich (72).
Turning markaziy uchrashuvi 28 mart kuni «Navbahor» va «Andijon» klublari o‘rtasidagi vodiy derbisi bo‘ldi. Namangandagi bahsda Sergey Lushan shogirdlari 2-daqiqadayoq hisobni ochgandi, ko‘p o‘tmay Gilerme Gedeshning avtogoli sabab hisob tenglashdi – 1:1.
Ikkinchi bo‘limda G‘ulomov 51-daqiqada mezbonlarni hisobda oldinga olib chiqdi, keyinroq Mehanovich qizil kartochka olib, mehmonlar bir kishi kam bo‘lib qolishdi. Shunga qaramay, andijonliklar Teydining 90+7-daqiqadagi avtogoli evaziga safardan ochko bilan qaytadigan bo‘lishdi – 2:2.
«Navbahor» yangi mavsumni «Dinamo» bilan durangdan boshlagan (0:0), keyin esa safarda «So‘g‘diyona»dan ustun kelgandi (3:2). Endilikda namanganliklar 5 ochko bilan turnir jadvalining 6-o‘rnida joylashgan. «Andijon» uchun esa taqvim murakkabroq edi, O‘zbekiston kubogining amaldagi sohiblari avvaliga vodiy derbisida debyutant qo‘qonliklar bilan durang o‘ynagan (1:1), keyin amaldagi chempion «Nasaf» bilan ham shunday durang hisob qayd etilgandi (1:1), Namanganda qatorasiga uchinchi durangini qayd etgan jamoa turnir jadvalida hozircha 9-o‘rinda.
«Qizilqum» – OKMK 1:3
Gollar: Elguja Lobjanidze 39 – Islom To‘xtaxo‘jayev 12, Giorgi Papava 51, Nodirbek Abdurazzoqov 75.
Aniq ijro etilmagan penalti: Xurshid G‘iyosov (OKMK, darvozabon) 30.
Olmaliq klubi Samarqandga safar qilib, «Qizilqum»ga qarshi saf tortdi. Uchrashuvda Islom To‘xtaxo‘jayev hisobni ochgan bo‘lsa, 30-daqiqada Xurshid G‘iyosov penaltidan foydalana olmadi. Bo‘lim yakunida esa Navoiy jamoasi hisobni tenglashtirdi.
Ikkinchi bo‘limda esa Mirjalol Qosimov shogirdlari yana ikkita gol urib, mavsumda ketma-ket uchinchi g‘alabaga erishishdi – 3:1.
Olmaliqliklar bundan oldingi turlarda «Buxoro» (2:1) va «Paxtakor»ni (2:0) mag‘lub etgandi, endi jamoa 9 ochko bilan turnir jadvalida yaqqol peshqadamga aylandi, «Qizilqum» hisobida 3 ochko mavjud.
Toshkentdagi bahsda Luis Kachorri 43-daqiqada hisobni ochdi. Ikkinchi bo‘limda esa «qaldirg‘ochlar» yana ikkita gol urishga muvaffaq bo‘ldi. 74-daqiqada Ashortia penaltini golga aylantirgan bo‘lsa, 90-daqiqada Kachorri dubl muallifiga aylandi. Endi u 4 gol bilan chempionat to‘purarlari ro‘yxatini boshqarmoqda.
Mehmonlar safida yagona golni qo‘shimcha daqiqalarda Muhammadali Abdurahmonov penaltidan kiritdi.
Bu natijadan so‘ng Ilyos Zeytullayev shogirdlari 7 ochko bilan 2-o‘ringa ko‘tarilib oldi. Termiz klubi esa hamon ochko to‘play olmagan holda so‘nggi pog‘onani band etib turibdi.
«Paxtakor» o‘z maydonida kutilmaganda «Dinamo»ga yutqazib qo‘ydi.
Uchrashuvning 56-daqiqasida mezbonlar raqib darvozasini ishg‘ol etishgandi, ammo gol ofsayd holati tufayli inobatga olinmadi. Bir necha daqiqa o‘tib mehmonlar hujumchisi, to‘purarlik salohiyatini namoyish etib, Superligada o‘tgan mavsum kashfiyoti bo‘lgan Anvarjon Hojimirzayev o‘z imkoniyatidan unumli foydalandi va g‘alaba golini urdi.
Favorit ustidan qozonilgan g‘alaba evaziga samarqandliklar ochkolari sonini 7 taga yetkazdi va turnir jadvalida 3-o‘ringa joylashdi. Jamoa uch o‘yinda ham o‘z darvozasi daxlsizligini saqlab qolgan.
OChLdagi ishtiroki tufayli birinchi turni o‘tkazib yuborgan «Paxtakor» keyingi ikki o‘yinda yutqazdi (2-turda OKMKga 0:2 hisobida) va birorta ochko ololmasdan, turnir jadvalida 15-o‘rinda joylashgan, toshkentliklar to‘plar nisbati evaziga faqat 16-o‘rindagi «Surxon»dan yaxshiroq holatda.
Turning markaziy uchrashuvlaridan yana biri, bu mavsum uchun chempionlikka da’vogarlar sifatida ko‘rilayotgan «Nasaf» va «Neftchi» ham o‘zaro durang o‘ynadi. Ushbu durang farg‘onaliklar uchun joriy mavsumdagi uchinchisi bo‘ldi. 3-turdan so‘ng jamoa hisobida 3 ochko mavjud. Qarshiliklar esa ikki durang, bir g‘alaba bilan 5 ochko to‘plab turibdi.
