Kiyev: Ukraina qurolli kuchlari Baxmut yaqinida oldinga siljishda davom etmoqda

Malyarning so‘zlariga ko‘ra, Baxmutning o‘zi ham “juda qaynoq” nuqta bo‘lib qolmoqda.

“Dushman u yerga bor kuchini to‘plab, yo‘lidagi hamma narsani vayron qilib olg‘a intilmoqda. Keskin janglar davom etmoqda”, dedi u.

Rossiya Mudofaa vazirligi Rossiya qo‘shinlarining Baxmut shimolidagi pozitsiyalaridan chekinganini tan oldi. Bundan idora rasmiy vakili Igor Konashenkovning brifingidagi ma’lumotlar darak beradi. 

Rossiya qo‘shinlari "Yug" guruhining Malolilinovskoye yo‘nalishidagi bo‘linmalari "Berxovskoye suv omborining qulay sharoitlarini hisobga olgan holda" chiziqni egallab oldilar, dedi Konashenkov hamda buni "mudofaa barqarorligini oshirish maqsadi bilan" tushuntirdi. 

Avvalroq, "Vagner" xususiy harbiy kompaniyasi (XHK) asoschisi Yevgeniy Prigojin, rossiyalik harbiy blogerlar va Ukraina Qurolli kuchlari Ukraina armiyasining hududda muvaffaqiyatga erishgani haqida xabar bergan edi.

ISW urushni o‘rganish bo‘yicha Amerika institutining so‘nggi hisobotiga ko‘ra, Ukraina Qurolli kuchlari muvaffaqiyati Ukrainaning kutilayotgan qarshi hujumi fonida Rossiya axborot maydonida vahimani kuchaytirdi.