AQSh Malidagi «Vagner» XHK rahbariga qarshi sanksiyalar kiritdi

Qo‘shma Shtatlar Malidagi «Vagner» XHK yollanma askarlari boshlig‘i rossiyalik Ivan Maslovga Ukraina bilan urush uchun Rossiyaga noqonuniy qurol olib kirganlik bo‘yicha sanksiyalar kiritdi. «Vagner guruhi» xorijiy yetkazib beruvchilardan qurol tizimlarini sotib olishga va bu qurollarni uchinchi tomon sifatida Mali orqali jo‘natishga uringaniga oid alomatlar bor», — deyiladi 25 may, payshanba kuni AQSh Moliya vazirligi bayonotida. 

Bunga Ukrainaga qarshi urushda foydalanish uchun Mali orqali minalar, dronlar, radarlar va qarshi batareya tizimlarini sotib olishga urinishlar kiradi, deyiladi hujjatda. Vashingtonga ko‘ra, yollanma jangarilar tranzitni amalga oshirish uchun qalbaki hujjatlardan foydalanishni rejalashtirgan. 

AQSh Moliya vazirligi ma’lumotlariga ko‘ra, Maslov Mali rasmiylari bilan rossiyalik yollanma askarlarning mamlakatdagi ishtirokini kengaytirish uchun yaqindan hamkorlik qilgan. Bundan tashqari, u «Vagner» XHK egasi Yevgeniy Prigojinning bir qator Afrika mamlakatlari vakillari bilan uchrashuvlarini tashkil etgan, shuningdek, Prigojinning tog‘-kon sanoatidagi manfaatlarini ilgari surgan. 

«Vagner guruhi»ning Afrika qit’asida mavjudligi har qanday mamlakat uchun barqarorlikni buzuvchi kuch bo‘lib, bu guruh resurslarini suveren hududga joylashtirish imkonini beradi», - deydi AQSh moliya vazirining terrorizmga qarshi kurash va moliyaviy razvedka bo‘yicha o‘rinbosari Brayan Nelson.