AQSh Rossiya ichidagi hujumlarni qo‘llab-quvvatlamasligini aytdi 

Qo‘shma Shtatlar Moskva shahriga uchuvchisiz uchoqlar yordamida uyushtirilgan hujumlarni qo‘llab-quvvatlamaydi va bor e’tiborini Ukrainaga o‘z hududlarini qaytarib olishga yordam berishga qaratadi. Bu haqda Reuters xabar berdi. 

«Biz yangilikni ko‘rdik va sodir bo‘lgan voqea haqida ma’lumot yig‘ishda davom etmoqdamiz. Umuman olganda, biz Rossiya ichidagi hujumlarni qo‘llab-quvvatlamaymiz», dedi Oq uy matbuot kotibi Karin Jan-Per 30 may kuni. 

Uning so‘zlariga ko‘ra, Vashington «Ukrainani o‘z suveren hududlarini qaytarib olishi uchun zarur bo‘lgan texnikalar va tayyorgarlik bilan ta’minlashga e’tibor qaratadi». 

Rossiya rasmiylari xabariga ko‘ra, 30 may kuni Ukraina uchuvchisiz uchoqlari Moskvadagi binolarga zarba berib, prezident Vladimir Putin va boshqa rus elitasi qarorgohlari joylashgan hududlarni nishonga olgan. Moskva meri so‘zlariga ko‘ra, hodisalarda ikki kishi jarohatlangan. 

Rossiya prezidenti Vladimir Putin ushbu hujumlar Rossiyani qo‘rqitish va provokatsiya ekanini ta’kidlab, Moskva atrofida havo mudofaasi kuchaytirilishini aytdi.