O‘zbekiston va Eron savdodagi to‘siqlarni bartaraf etish bo‘yicha ishchi guruh tuzadi

Toshkent shahrida 31 may kuni O‘zbekiston va Eron o‘rtasidagi Savdo-iqtisodiy va ilmiy-texnikaviy hamkorlik bo‘yicha hukumatlararo komissiyaning 15-yig‘ilishi bo‘lib o‘tdi.

Foto: gov.uz

Tadbirga O‘zbekiston tomonidan Investitsiyalar, sanoat va savdo vaziri Laziz Qudratov, Eron tomonidan esa Eron sanoat, konlar va savdo vaziri vazifasini bajaruvchi Said Mahdiy Niyoziy hamraislik qildi. Unda ikki davlatning tegishli vazirlik va idoralari rahbarlari ham ishtirok etdi.

Savdo ko‘rsatkichlarining barqaror o‘sishini ta’minlash maqsadida tomonlar o‘zaro tovar ayirboshlash hajmini yiliga 1 milliard dollarga yetkazish bo‘yicha amaliy chora-tadbirlar dasturini imzolash, Imtiyozli savdo bitimini qabul qilishni jadallashtirish, ikkala davlatning hududlarida Made in Iran va Made in Uzbekistan ko‘rgazmalarini o‘tkazishga kelishib oldi. Bundan tashqari, ikki tomonlama savdodagi to‘siqlarni aniqlash va bartaraf etish bo‘yicha ishchi guruh tuziladi.

Investitsiyalar sohasida hamkorlik va sanoat kooperatsiyasini rivojlantirish bo‘yicha navbatdagi tadbirlar muhokama qilindi. Tomonlar o‘zaro manfaatli sohalarda yangi qo‘shma loyihalarni amalga oshirish uchun ikki mamlakatning yirik kompaniyalarini jalb etishga tayyor ekanini bildirdi.

Qishloq xo‘jaligi va oziq-ovqat xavfsizligi yo‘nalishida hamkorlikni chuqurlashtirish, madaniy-gumanitar sohada o‘zaro munosabatlarni rivojlantirish bo‘yicha aniq chora-tadbirlar kelishib olindi.

Yig‘ilish yakunlari bo‘yicha muzokaralar davomida erishilgan barcha ikki tomonlama kelishuvlarni aks ettirgan hamda O‘zbek-Eron hamkorligini har tomonlama chuqurlashtirishga qaratilgan Yakuniy bayonnoma imzolandi.

#Eron #savdo