Yangihayot tumanida ko‘pqavatli uyda yong‘in chiqdi

Kecha lift avariyasi ro‘y bergan Yangi Darxon mahallasidagi uylardan birida yong‘in chiqdi. FVVga ko‘ra, jismonan jabrlanganlar yo‘q.

Foto: Ijtimoiy tarmoqlar

19 iyun kuni Toshkent shahri, Yangihayot tumani, «Yangi Darxon» mahallasi, Navo ko‘chasida joylashgan ko‘pqavatli uyda yong‘in chiqdi.

Favqulodda vaziyatlar boshqarmasi (FVB) xabariga ko‘ra, yong‘in haqida ma’lumot soat 20:29 da kelib tushgan. Shundan so‘ng, 4 ta yong‘in-qutqaruv ekipaji va 2 ta avtonarvon soat 20:38 da voqea joyiga yetib borgan. Yong‘in soat 20:56 da o‘rab olingan va soat 20:59 da o‘chirilgan.

Hodisa oqibatida jismonan jabrlanganlar yo‘qligi ma’lum qilindi.

Rasmiy xabarda yong‘in oqibatida 15-qavatdagi xonadonda 5 kv.m maydonda ko‘rpa yonib zararlangani aytiladi. Internetda tarqalgan videolarda esa ko‘p qavatli uyning 15-qavatidagi yong‘in 16-qavatga ham o‘tganini ko‘rish mumkin.

Yong‘in sababi va moddiy zarar miqdori aniqlanmoqda.