Andijon viloyat IIBning korrupsiyada gumonlanayotgan sobiq xodimlari sudlanmoqda

Andijon viloyat IIBning bir guruh mansabdorlari IIBning depozit hisob raqamidagi 5 mlrd 654 mln so‘m mablag‘larni o‘zlashtirib yuborgani xabar qilingan edi. Ular garov pullarini soxta hujjatlar orqali 138 nafar fuqaroning bank kartalariga o‘tkazib, naqdlashtirib olganlikda gumonlanyapti.

Andijon viloyati prokuraturasining ma’lum qilishicha, tergov natijasiga ko‘ra, viloyat IIB Moliya ta’minot xizmati boshlig‘i o‘rinbosari M.M. va boshqalarga nisbatan ayblov e’lon qilinib, jinoyat ishi sudga yuborilgan.

Oliy sud matbuot xizmatining Kun.uz'ga ma’lum qilishicha, hozirda mazkur jinoyat ishi JIB Baliqchi tumani sudida ko‘rib chiqilmoqda.

Ish hujjatlari ko‘pligi bois sud jarayonlari hali nihoyasiga yetmagan. Ochiq ko‘rilayotgan navbatdagi sud majlisi 2023 yil 4 avgust kuni JIB Baliqchi tuman sudida bo‘lib o‘tadi.

Sudlanuvchilar iltimosiga ko‘ra, jarayonni video yoki fotoga olish mumkin emas, lekin kirib qatnashish mumkin.