AQSh: Rossiyaning Nigerdagi to‘ntarishga aloqadorligi haqida ma’lumot yo‘q 

Qo‘shma Shtatlar Nigerdagi harbiy to‘ntarishga Rossiya yoki Rossiyaning «Vagner» xususiy harbiy kompaniyasi aloqadorligi haqida ishonchli dalillarga ega emas. Bu haqda 27 iyul, payshanba kuni Oq uy matbuot kotibi Karin Jan-Per ma’lum qildi.

Oq uy vakili G‘arbiy Afrika davlatidagi davlat to‘ntarishida Moskva rol o‘ynagan bo‘lishi mumkinmi, degan savolga: «Hozircha biz Rossiya yoki «Vagner» ishtiroki alomatlarini ko‘rmadik», dedi.

Bir kun avval Niger prezident gvardiyasi davlat rahbari Muhammad Bazumni qo‘lga olib, mamlakat poytaxti Niameydagi prezident saroyini to‘sib qo‘ygan edi. Dastlab prezident devoni na armiya, na Milliy gvardiya isyonchilarni qo‘llab-quvvatlamayotgani haqida xabar tarqatdi. Biroq, bir necha soat o‘tgach, milliy televideniye orqali chiqish paytida Niger harbiylari prezident Bazum chetlatilganini, chegaralar yopilganini va «butun mamlakat bo‘ylab komendantlik soati e’lon qilinganini» bildirdi.

Keyinroq harbiy qo‘mondonlik prezident gvardiyasi askarlarini qo‘llab-quvvatlab, rasmiy bayonot bilan chiqdi. Niger qurolli kuchlari bosh shtabi uchrashuv haqida xabar berdi, natijada ular «qon to‘kilishining oldini olish va armiya safida birlikni saqlash» uchun «mudofaa va xavfsizlik kuchlari bayonotini qo‘llab-quvvatlashga qaror qildi».