Tog‘li Qorabog‘dagi humanitar vaziyatning keskin yomonlashishi xalqaro hamjamiyatning shoshilinch e’tiborini talab qiladi, deya ma’lum qildi Yevroparlament. Boku Lochin yo‘lagi blokadasini tugatishi kerak, deb hisoblayapti Bryussel.
Boku xalqaro majburiyatlarni buzishi natijasida Tog‘li Qorabog‘dagi humanitar vaziyat og‘irlashmoqda, deb ma’lum qildi 1 avgust, seshanba kuni Yevroparlament. «Biz Ozarboyjon tomonidan 2020 yil 9 noyabrdagi o‘t ochishni to‘xtatish bo‘yicha majburiyatlarini va BMT Xalqaro sudining qonuniy kuchga kirgan qarorini buzgan holda, Lochin yo‘lagining blokadasi davom etayotgani sababli Tog‘li Qorabog‘dagi humanitar vaziyat keskin yomonlashayotganidan chuqur xavotirdamiz», — deyiladi Yevroparlamentning Janubiy Kavkaz bilan aloqalar bo‘yicha delegatsiyasi rahbari Marina Kalyurand, Yevroparlamentning Armaniston bo‘yicha ma’ruzachisi Andrey Kovachev hamda Ozarboyjon bo‘yicha ma’ruzachi Jyelyanya Zovkoning qo‘shma bayonotida.
Ular Bokuni blokadani zudlik bilan to‘xtatishga, «humanitar falokatning oldini olish bo‘yicha» xalqaro kelishuv va me’yorlarga rioya qilishga chaqirdi. Yevroparlament deputatlari eslatishicha, mart oyida Yevroparlament Yevropa Ittifoqi kengashini BMT Xalqaro sudining fevraldagi qarori zudlik bilan amalga oshirilmasa, Ozarboyjon davlat amaldorlariga qarshi maqsadli sanksiyalar joriy etishga chaqirgan. Iyun oyida esa Yevroparlament yig‘ilishida Yevropa Ittifoqining tashqi ishlar bo‘yicha oliy vakili Jozep Borrel YeI kengashida bunday sanksiyalarni joriy etish mavzusini ko‘tarish majburiyatini oldi.
Ma’ruzachilar fikricha, inqiroz kuchayishi xalqaro hamjamiyatning shoshilinch e’tiborini talab qiladi. «Deyarli sakkiz oydan beri Tog‘li Qorabog‘ aholisi qamal oqibatlaridan aziyat chekmoqda, faqat mahalliy ishlab chiqarish va insonparvarlik yordami, jumladan, Xalqaro Qizil Xoch Qo‘mitasi (XQXQ) evaziga omon qolmoqda. Ozarboyjon tomonidan blokadaning uzaytirilishi so‘nggi haftalarda insonparvarlik yordami, asosiy oziq-ovqat mahsulotlari, hayotiy tibbiy buyumlar va boshqa zarur tovarlar tanqisligiga olib keldi», - deb yozadi yevropalik parlamentariylar.
Ozarboyjonning o‘z hududiga Agdam yo‘li orqali yordam ko‘rsatish taklifi uning Lochin yo‘lagi bo‘yicha majburiyatlari bilan bog‘liq emas, deya ta’kidladi Yevroparlament. Deputatlar qo‘shimcha yo‘nalishlar ochish alohida masala ekanligini, buni Boku va Stepanakert o‘rtasidagi to‘g‘ridan to‘g‘ri muzokaralarda kelishib olish kerakligini ta’kidladi. «Mintaqada humanitar yordamga ruxsat berilishi kerak, har qanday to‘siqlar xalqaro humanitar huquqning buzilishini anglatadi», deb xulosa qildi Kalyurand, Kovachev va Zovko.
